АСТАНА. KazUnite – Қазақстан президенті Қасым-Жомарт Тоқаев АҚШ-тың Тәуелсіздік күніне орай Джозеф Байденге құттықтау жеделхатын жолдады. Бұл туралы Ақорда хабарлады.
Қасым-Жомарт Тоқаев АҚШ Президенті Джозеф Байденді және Америка халқын Тәуелсіздік күнімен құттықтады.
«Президент Қазақстан мен Американың қауіпсіздікті қамтамасыз ету, энергетика, инвестиция тарту, климаттың өзгеруіне қарсы күрес салаларындағы кеңейтілген стратегиялық серіктестіктің және екі ел халықтары арасындағы қатынастардың қарқынды дамып келе жатқанын атап өтті. Мемлекет басшысы өз жеделхатында Орталық Азия аймағының қауіпсіздігі мен өзара байланысын нығайтуға қолдау көрсеткені үшін ризашылығын білдірді», – делінген Ақорданың ақпаратында.
Сонымен қатар Қасым-Жомарт Тоқаев барлық саладағы ынтымақтастықтың одан әрі табысты дами беретініне сенім білдірді.
4 шілде – АҚШ тәуелсіздік күні. 1776 жылы АҚШ-тың тәуелсіздік декларациясы қабылданған. Америкалықтардың көпшілігі бұл мерекені «Шілденің төрті» деп атайды. Тәуелсіздік күні — бұл АҚШ-тың ұлттық мейрамы. Бұл мейрамда отшашулар атылады, парадтар, барбекю пісіру, карнавалдар, жәрмеңкелер, пикниктер, концерттер, бейсбол ойындары, отбасылық кездесулер ұйымдастырылады. Сондай-ақ билік өкілдері халыққа жолдау жоддайды, әртүрлі рәсімдер өткізіледі.
