НЬЮ-ЙОРК. KazUnite – Канададағы өрт салдарынан 100 млн америкалықтың тынысы тарылды. АҚШ-тың көрші елмен шектесетін бірқатар штатын қою түтін тұмшалады.
Канададағы өрттің түтіні АҚШ-тың шығыс жағындағы Нью-Йорк, Вашингтон, Пенсильвания сынды бірқатар штатына жайылды.
Қою түтін тұмшалаған Нью-Йорк әлемдегі ауасы ең лас қала атанды. Тұрғындар қазіргі уақытта бетпердемен жүруге мәжбүр. Нью-Йоркті, әсіресе, 7 маусым күні түтін қатты басып, бүгін аздап сейілді. Мамандардың дерегіне сүйенсек, жұма күні ауа едәуір тазарады.
Алайда Нью-Йоркті басқан түтін Атлант мұхитына қарай ауып, айналадағы табиғатты ластауын тоқтатпайды деседі.
Канаданың Альберт (батыс) және Жаңа Шотландия (шығыс) провинцияларынан кейін түтін Квебекке ауған. Квебек Американың 4 штатымен, яғни Мэн, Нью-Гэмпшир, Нью-Йорк және Вермонт штаттарымен шектеседі.
Канадалық Орманды өрттен қорғау қоғамының (Sopfeu) мәліметінше, өрттің 140 ошағы анықталған. Оның 100-ге жуығы ырық бермей жатқан көрінеді.
Квебекке халықаралық көмек, соның ішінде Франциядан 100-ге жуық өрт сөндіруші жөнелтілген. Провинциялар басшыларының дерегінше, өрт сөндірушілер санын 1200-ге жеткізу көзделіп отыр.
«Жүздеген америкалық өрт сөндіруші Канадаға келіп жетті. Басқалары әлі де жолда келе жатыр», – деп мәлімдеді Канада премьер-министрі Джастин Трюдо АҚШ президенті Джо Байденмен арадағы келіссөзден кейін.
Ал Ақ үйдің баспасөз хатшысы Карин Жан-Пьер бұл жағдайды өмірімізге әсер ететін тағы бір дабылды белгі екенін атап өтті.
Нью-Йоркте Бостандық мүсіні мен Манхэттеннің зәулім ғимараттары қызғылт сары тұманға оранды. Пандемия кезіндегідей көшелерде бетперделер қайта пайда болды. АҚШ үкіметі, сонымен қатар денсаулығында ақауы бар азаматтарды ауа сапасының күрт нашарлауына байланысты сақтық шараларын ұстануға шақырды.
Сәрсенбі күні қалың түтін басқандықтан, АҚШ Азаматтық авиация агенттігі (FAA) әуе қатынасын бәсеңдетіп, тіпті осы аймаққа кейбір ұшақтарды қондыруға мәжбүр болды.
