ВАШИНГТОН. KazUnite – АҚШ астанасының төрінде6 Капитолий мен Вашингтон мемориалының қақ ортасында қазақтың қолөнершілері жұрт назарын өзіне аударды. Онда қазақ қолөнершілерінің жұмыстары кеңінен таныстырылды.
6-9 шілде күндері қазақ қолөнершілері америкалықтар мен әлемнің 100-ден аса елінен келген туристерге шеберлік сабақ ұйымдастырып, өздері жасаған бұйымдарды көрсетті.
Жалпы, Смитсон фальклорлық фестивалі аясында өткен «Тәңір әлемі» бағдарламасына қазақстандық қолөнершілер «Шеврон» компаниясының қолдауымен келген.
Қазақстанның АҚШ-тағы төтенше және өкілетті елшісі Ержан Ашықбаев бұл жерде Орта Азиядан тек Қазақстанның ғана экспозициясы тұрғанын атап өтті.
Смитсон халықтық фестиваліне 800 шебер келді. Олар киіз басу, кесте тігу, тоқыма, ағаш өңдеу, музыкалық аспаптар жасау сияқты көнеден келе жатқан ұлттық бай мұраны таныстырды.
«Фестивальдің екінші күнінде-ақ біздің жанкүйерлеріміз пайда болды. Күні бойғы уақыттарын бізбен бірге өткізген олар тағы да бірдеңе үйренуге ниетті екендіктерін білдіріп, екінші қайтара келіп жатыр. Қолөнершілеріміздің жасаған бұйымдарына қызығушылық өте жоғары», – деді Қазақстан қолөнершілері одағының төрайымы Айжан Бекқұлова тілшілерге берген сұхбатында.
Көнеден келе жатқан ырым аластауды да америкалықтар мен шетелдік туристер таңдана тамашалады. Киіз басу өнеріне куә болған олар өздері де арнайы инемен жүн талшықтарын нығыздап көрді.
Мұндайды алғаш рет көріп тұрғанын айтқан Вашингтон тұрғыны Земи керемет әсерге бөленгенін жеткізді.
Жыл сайын өтетін мәдени шараға АҚШ-тың 50 штатынан бөлек, әлемнің 100-ден аса елінен туристер келеді.
