ВАШИНГТОН. KazUnite – АҚШ-тың Мемлекеттік хатшысы Энтони Дж. Блинкен барша мұсылман қауымын Ораза айт мерекесімен құттықтады.
«Мемлекеттік департамент пен Америка халқының атынан біз АҚШ-тағы және бүкіл әлемдегі мұсылмандарды Ораза айт мерекесімен құттықтап, жылы лебізімізді білдіргіміз келеді. Осы ретте қауымдастықтар Рамазан айындағы, ораза кезіндегі қайырымдылық шараларынан алатын терең рухани, қоғамдық және гуманитарлық артықшылықтарды айтып жатады. Отбасылар мен қауымдастықтар дұға ету, мерекелік тағамдармен бөлісу және сыйлықтармен алмасу үшін жиналса, бұл бүкіл әлемдегі мұсылман мәдениеттері мен дәстүрлерінің алуан түрлілігіне тән күш пен төзімділікті тануға мүмкіндік береді. Ораза айт бізге жанашырлықтың және бірліктің маңыздылығын, діндер мен ұлттардың шеңберінен шығатын құндылықтарды еске салады», – деді Энтони Блинкен.
Сонымен қатар ол бұл күннің бейбіт қауымдастықтар құруға деген ортақ міндеттемелер туралы ойлануға мүмкіндік беретінін атап өтті.
«Осы күнді жақсылықпен өткізе отырып, қақтығыстар, зорлық-зомбылық, қудалау немесе гуманитарлық дағдарыстар салдарынан үйлерінің қауіпсіздігі мен жайлылығын да қамтамасыз ете алмай жүргендер туралы ұмытпайық. Америка Құрама Штаттары барлығына бейбітшілікті, әділеттілікті және діни бостандықты насихаттауға деген ұмтылысында мызғымас күш болып қала береді. Сіздерге Ораза айт мерекесі құтты болсын! Қуанышты сәттеріңіз көп болсын деп тілейміз. Айт мүбарак болсын!» – деді АҚШ-тың Мемлекеттік хатшысы.
