МЕЛЬБУРН. KazUnite – Тикток арқылы шетелдіктер арасында аса танымалдылыққа ие болған қазақ баласын естідіңіз бе? Ол – шетелдік телеарналар жарыса сұхбат алып жүрген Аустралияның Мельбурн қаласында тұратын Рустам Разиев.
Рустам супермаркеттерде бөгде адамның тауар ақысын одан бұрын картасымен төлеп беріп, көпшіліктің алғысын алуда. Адамдардың эмоциясын тиктоктағы өзінің аккаунтына жүктеп, содан миллиондаған қаралым жинап жүр.
Посмотреть эту публикацию в Instagram
Тиктокта қазір 7 миллионға жуық жазылушысы бар Рустам Разиевтің желі арқылы көпшілікке тараған қайырымдылық істері туралы шетелдік басылымдар жарыса жазуда.
Рустаммен біз де байланысқа шығып, бірер сұрағымызды жолдадық. 1991 жылы Алматыда дүниеге келген ол 16 жасында шетелде оқуға аттаныпты. Содан жылына 1-2 рет елге келіп жүріпті. Соңғы рет Қазақстанда 4 жыл бұрын болыпты.
«Мен брокер-консультантпын. Бала кезімде отбасымызда тұрмыстық қиындықтар болды. Ата-анам, әпкем бәріміз бір бөлмелі пәтерде тұрдық. Тамаққа ақша жетпеген кездер де болды. Сол үшін достарымды үйге шақыруға ұялатынмын. Бұл жағдай мені біраз ойландырды. Кейін ақшам болғанда адамдарға азық-түлік сатып алуға, жалпы қолымнан келгенше көмектесемін деп өз-өзіме уәде бердім. Әрине, бір кездері тұрмыстық жағдайымыздың төмен болғаны үшін өкінбеймін. Ол жағдай менің бойымда жақсы қасиеттердің болуына пайдасын тигізді. Сіздерге де бар жақсылықты тілеймін», – деді Рустам Разиев KazUnite тілшісіне.
Рустам Разиев KazUnite оқырмандарына арнайы видео сәлем жолдады.
