НЬЮ-ЙОРК. KazUnite – Америкадағы қазақтардың тұңғыш құрылтайы 2025 жылдың 3 тамызында Нью-Йорк қаласында өтеді.
Құрылтайды Нью-Йорк штатындағы «Қазақ Америка орталығы» ұйымдастырады. Орталықтың төрағасы Бейбітхан Бөрінің айтуынша, құрылтайдың күн тәртібінде бірқатар мәселе қарастырылады.
Мысалы, Ортақ коммуникация және ақпараттандыру. Яғни әр штат арасында тұрақты байланыс орнатып, қазақтардың басын біріктіретін ортақ хабарландырулар ұйымдастыру жүйесін құру (call center); «Тәуелсіз Қазақ Қорын» заңды түрде тіркеу. Ұйымдастырушылардың сөзінше, бұл қор АҚШ-тағы қазақ диаспорасының дамуына зор ықпал етеді.
Сонымен қатар құрылтайда «Тәуелсіз Қазақ Қорының» тиімді жұмыс істеуі үшін белсенді мүшелері тағайындалмақ.
Бұдан бөлек, Қазақ диаспорасы арасында кәсіпкерлікті дамыту мәселесі, сондай-ақ Қазақ мәдени орталықтарын әр штаттан ашу да қарастырылмақ.
«АҚШ-тың әр штатында қазақ мәдениетін насихаттайтын, ұлттық салт-дәстүрді сақтайтын және жаңа мамандыққа үйрететін орталықтар ашуды қарастырамыз. Жалпы, бұл құрылтай АҚШ-тағы әр қазақ үшін маңызды. Бірлік болмай, тірлік болмас!» – деді «Қазақ Америка орталығының» төрағасы Бейбітхан Бөрі.
Оның айтуынша, бұл іс-шараға әлемнің кез келген еліндегі қазақтар қатыса алады. Қазірдің өзінде Еуропада тұратын қазақтар тарапынан құрылтайға қатысуға ниет білдіріп отырғандар бар.
