ВАШИНГТОН. 1 сәуір. KazUnite – Бүгін АҚШ Мемлекеттік депртаменті Америка мен Қазақстан арасындағы әуе қатынасы туралы Келісім күшіне енгенін мәлімдеді.
Бұл келісімге 2019 жылдың 30 желтоқсанында қол қойылған болатын.
Екіжақты келісім АҚШ-тың ашық аспан астындағы халықаралық авиациялық саясатына және авиациялық қауіпсіздігінің жоғары стандарттарына қатысты міндеттемелеріне сәйкес, Азаматтық авиацияның Қазақстанмен қазіргі заманғы қатынастарын белгілейді. Келісім шектеусіз өткізу қабілеті мен қызмет көрсету жиілігін, ашық маршруттарға құқықтарды, либералды чартер режимін және кодтарды ортақ пайдаланудың ашық мүмкіндіктерін көрсететін ережелерді қамтиды.
«АҚШ тарабы бұл қадамды Орта Азиядағы Халықаралық Азаматтық авиация секторын либерализациялауға ықпалы тиетін қадам деп бағалап отыр. Бұл АҚШ пен Қазақстан, АҚШ пен Орта Азия елдері арасындағы берік экономикалық және сауда серіктестігін одан әрі кеңейтеді. Оған қоса, екі құрлықтағы адамдар арасындағы байланысты дамытады, авиакомпаниялар, туристік компаниялар мен клиенттер үшін жаңа мүмкіндіктер жасайды. Авиатасымалдаушылар саяхатшылар мен жүк жөнелтушілерге барынша қолжетімді, ыңғайлы және тиімді авиатасымалдарды ұсынатын болады. Бұл өз кезегінде Қазақстан мен Орта Азиядағы туризм мен сауданың дамуына ықпал етеді», – делінген АҚШ Мемлекеттік Департаменті таратқан ақпаратта.
