ВАШИНГТОН. KazUnite – Қазақстанның Америка Құрама Штаттарындағы Елшілігі 1 маусымда «Қазақстан Конституциясына өзгерістер мен толықтырулар қабылдау мәселесі бойынша алдағы республикалық референдум» тақырыбында онлайн кездесу өткізді. Оған Қазақстанның АҚШ-тағы Елшісі Ержан Ашықбаев және АҚШ-та тұратын, білім алып жатқан қазақ азаматтары мен БАҚ өкілдері қатысты.

Онлайн кездесу кезінде Референдумға қатысу үшін қайда бару керегін, Конституциядағы Президенттің құзыры жайлы сұрақтар қойылды.
Америкадағы қазақ азаматтары ҚР Елшілігі өкілдеріне тақырыптан тыс сұрақтар да қойды. Соның ішінде, Қаңтар оқиғасы жайлы сұрағандар болды. Ең көп қойылған сұрақтар Қазақстандағы мемлекеттік тілдің тағдырына байланысты болды. Атап айтсақ, Конституцияның 7-бабының 2-тармағын алып тастау, Қазақстанда мемлекеттік қызметке қабылдарда және ҚР азаматтығын берерде үміткерден ел тарихы мен мемлекеттік тілді білуін талап ету жайлы сұрақ жиі қойылды.

Онлайн жиында kazunite.com-ның АҚШ-тағы өкілдері де өз сұрақтарына жауап алды.

АҚШ-тың кейбір ЖОО-ның филиалын Қазақстанда ашу жоспарда бар екені бұдан бұрын айтылды. Бұл жоспар қашан іске асады және қандай университеттердің филиалы ашылмақ деген сұраққа Елшілік өкілі жауап берді. Ал Қазақстан жастарына елден шықпай-ақ АҚШ университеттерінде оқу мүмкіндігін тудыру, соның ішінде АҚШ университеттерінің филиалдарын ашу мәселесі бойынша сұрағанымызда әзірге тек Солтүстік Қазақстан университеті мен Аризона мемлекеттік университеті арасында келісім жасалып жатқанын, биыл күзде құжаттарды дайындау мен келіссөз жасасу процесі аяқталуы мүмкін екені айтылды.

Қазақстанның АҚШ-тағы Елшілігі болашақта АҚШ-тағы қазақтардың басын қосатын іс-шараларды өткізу жоспарда бар екенін жеткізді.