НЬЮ-ЙОРК. KazUnite – АҚШ-тың Қазақстандағы елшісі Дэниел Розенблюм Қостанайға барып, ұлт ұстазы Ахмет Байтұрсынұлының ескерткішіне тағзым етті. Бұл туралы KazUnite тілшісі АҚШ елшілігіне сілтеме жасап хабарлайды.
«Қостанайға алғаш рет келдім. Ахмет Байтұрсынұлының ескерткішін көру мен үшін үлкен мәртебе», – деді АҚШ елшісі.
Дэниел Розенблюм ұлт ұстазы Ахмет Байтұрсынұлының кезінде қазақ халқы үшін ағартушылық бағытта қыруар жұмыс атқарып, әліпбиінің негізін қалағанын, алғашқы қазақ газетін ашқанын және басқа да атқарған сүбелі істері туралы айтты.
«Америка Құрама Штаттары Қазақстанның бірегей болмысын атап өтуде қолдау көрсететін сенімді серіктесі. Aсcses сияқты бағдарламалар негізінде мәдени алмасулар мен гранттар арқылы және Қазақстанның дарынды шығармашылық тұлғаларымен ынтымақтастықта білім беруді дамытуға, байланысты нығайтуға атсалысып жатырмыз», – деді Дэниел Розенблюм.
