ВАШИНГТОН. KazUnite – АҚШ-та Киберкеңістік және цифрлық саясат жөніндегі Бюро құрылды. Бұл туралы бүгін АҚШ Мемлекеттік департаментінің баспасөз қызметінің кеңсесі мәлімдеді.
Kиберкеңістік және цифрлық саясат бюросы (CDP) Ұлттық қауіпсіздік мәселелері, киберкеңістікке, цифрлық технологияларға және цифрлық саясатқа байланысты АҚШ құндылықтарының экономикалық мүмкіндіктерін сараптау сияқты жұмыстарды атқарады.
CDP бюросы үш саяси бөлімшеден тұрады: Киберкеңістіктегі халықаралық қауіпсіздік, Ақпарат және коммуникациялар саласындағы халықаралық саясат және Цифрлық бостандық.
Бүгін қызметін бастаған мекемеге жоғары дәрежелі дипломатиялық қызметтің қызметкері Дженнифер Бахус бюро хатшысы көмекшісінің бірінші орынбасары қызметіне тағайындалды. Мишель Маркофф Мемлекеттік хатшының киберкеңістіктегі халықаралық қауіпсіздік жөніндегі көмекшісінің орынбасары қызметін атқаратын болды. Стивен Андерсон Мемлекеттік хатшының халықаралық ақпараттық және коммуникациялық саясат жөніндегі көмекшісінің орынбасары қызметін, ал Блейк Питерсон цифрлық Бостандық жөніндегі үйлестіруші қызметін атқарады.
Осылайша, АҚШ киберқауіпсіздікті қамтамасыз етуге жауапты су жаңа мекеменің біраз қызметкерін бекітіп үлгерді. Ал бюроны Сенаторлардың сынынан өткен ерекше тапсырмаларды орындауға қауқарлы маман басқаратын болады.
