НЬЮ-ЙОРК. Экологиялық білім күніне байланысты АҚШ-тағы KazUnite медиа компаниясы ұйымдастырған таспагер мамандар арасындағы «Табиғатты аялау» атты халықаралық бейне материал байқауының қорытындысы шығарылды.
Халықаралық байқауға Қазақстанның Астана, Алматы, Шымкент қалалары мен Ақмола, Түркістан, Қызылорда, Абай және басқа да бірқатар облыстары мен АҚШ, Италия, Түркия, Моңғолия сияқты елдердің таспагер мамандарынан экология тақырыбындағы 50-ден аса бейне материал келіп түсті.
Байқауға кинорежиссер Даниэль Эрнандес Алонзо (Нью-Йорк), «Қазақстан» РТРК» АҚ «Qazaqstan» ҰТА-ның, Президент press pool қызметкері, Ақпарат саласының үздігі, «Құрмет иесі» марапатының иегері, белгілі қоюшы-телеоператор Жанболат Қобдабай (Астана), Қазақстан Киноматографистер лигасының мүшесі, «Taspafilms» кинокомпаниясының директоры, режиссер-продюсер Асхат Мұсабай (Чикаго), Журналистер арасындағы халықаралық және республикалық конкурстардың жеңімпазы, Edunews.kz ақпарат агенттігінің тілшісі, «Болашақ» бағдарламасының стипендиаты, аналитик журналист, климат өзгеруіне қатысты гранттық жобалардың жеңімпазы, New York Film Academy түлегі Рахила Бекназарқызы (Нью-Йорк) сынды сала мамандары қазылық етті.
Сонымен, қазылар алқасының шешімімен көпшілік дауыс бойынша 1-орынды Түркияның Анкара қаласында оқитын Арман Қуанышбек, 2-орынды Эмма (АҚШ, Нью-Йорк), 3-орынды Ерлан Бапанов (Қазақстан, Абай облысы) иеленді.
Жүлдегерлер дипломдармен және бағалы сыйлықпен марапатталды.
Айта кетсек, жыл сайын 15 сәуірде БҰҰ көптеген елдегі қоғамдарды экологиялық білімін жетілдіруге шақырады. Бұл ретте әлем елдерінде әртүрлі экологиялық іс-шаралар жүйелі түрде ұйымдастырылып тұрады. Мысалы, Қазақстанда 2024 жылдың сәуір айында ел президенті Қасым-Жомарт Тоқаевтың бастамасымен «Таза Қазақстан» ауқымды экологиялық акциясы қолға алынып, елдің әр өңірінде тазалық жұмыстары ұдайы жүргізіліп келеді.
KazUnite медиа компаниясының директоры Нәзира Байырбек бастаған ұйымдастыру алқасы жүлдегерлерді құттықтай отырып, байқауға қатысушыларға және әділ қазылар мүшелеріне зор алғыс білдіреді.
