НЬЮ-ЙОРК. KazUnite – Көпшілікке «Анашым», «Қыз сыны», «Сыңарым» «Әке туралы толғау»  әндерімен танымал әнші-композитор, Қазақстанның еңбек сіңірген әртісі Марат Омаров Голливудта «Малена» атты шытырман оқиғалы фильмге түсіп жатыр.

«Бала кезімізден киноларын тамсана көріп өскен «Нью-Йорк фильм академиясы», «Warner Brothers», «Universal Studios» киностудияларынан қол созым жерде жүрген соң ба, осы орта маған қатты әсер етті. Нәтижесінде кастингтен өтіп, «Малена» фильміне түсуге арнайы шақырту алдым. Бұл – криминалды-экшн жанрындағы фильм. Мен фильмде оққағардың рөлін сомдаймын. Туынды эмигранттардың өмірі жайлы, соның ішінде Малена деген қыздың Мексикадан Америкаға өтіп келгендегі бастан кешкен қиындықтары көрсетіледі», – деді Марат Омаров.

Сонымен қатар ол киноға кастинг жасалып, басқа да фильмдерге түсуге ниетті екенін айтады.

«Қазақтарды, әсіресе, еліміздің спортшыларын ерекше құрметтейтін Нью-Йорк фильм академиясының директоры Маклер деген азаматпен таныстым. Болашақта киноға түсу үшін ол кісімен келісімшарт жасасып жатырмыз», – деп қосты ол.

Естеріңізге салсақ, біраз уақыт бұрын Марат Омаров KazUnite тілшісіне берген сұхбатында Голливуд фильмдеріне түсуге үміттеніп жүргенін айтқан болатын. Сұхбаттың толық нұсқасын осы сілтемеден оқи аласыз.