НЬЮ-ЙОРК. KazUnite – Нью-Йорк университетіндегі Артур Л. Картер атындағы журналистика институтында білімін жетілдіріп жүрген журналист Гүлдана Талғатқызы Семей полигоны жайлы деректі фильм түсірді.
Алғашқы деректі фильмінде автор әкесі жазушы Талғат Кеңесбаев (1961-2018) жайлы, Саржал ауылы, атом полигоны, «Невада-Семей» қозғалысы туралы қаузаған.
«Бір жылдай өзім зерттеп, сценарий жазып, әкемнің ауылы Саржалға барып түсіріп, Нью-Йоркке қайта оралып, Вашингтонға сапарлап, Венамен сұхбаттасып, архивтерді ақтарып, әкемнің Panasonic-інде сақталған видеоларды диджитал форматқа өткізіп, Premiere Pro-да монтаж жасап, топтастарым мен профессорларымның пікіріне құлақ асып, аниматор, композитормен жұмыс істеп, көрермен назарына ұсынып отырмын», – деп жазды Гүлдана Facebook-тегі аккаунтында.
NYU қабырғасында аталған деректі фильмнің тұсауы кесілді. Гүлдана Талғатқызы алдағы уақытта да осы бағыт бойынша түрлі тақырыпта деректі фильмдер түсіруді жалғастырмақ.
