ФИЛАДЕЛЬФИЯ. KazUnite – АҚШ-тағы қазақтар Қазақстанның Тәуелсіздік күніне дайындықты қазан айында бастады.
«Құрметті Отандастар! 15 желтоқсан күні Филадельфия қаласында өтетін Ту көтеру рәсіміне 2 мың жылдық тарихы бар тұғырлы Тараз қаласының қолөнершілері келіп қатысады. Жақында Тараз қаласы әлем бойынша 56-шы, Қазақстан бойынша 1-ші болып Дамаск, Қоқан, Самарқан сынды қолөнершілер қалалары қатарын толықтырды.
Осыған орай “Kazakh American Community in PA” қауымдастығы арнайы Тараз қаласы іскер әйелдер кеңесімен біріге отырып, “Тарихты Тараз” атты көрме ұйымдастырып отыр», – деп жазды Пенсильвания штатындағы қазақ қауымдастығының президенті Жұлдызай Исмаилова АҚШ-тағы қазақтар тобында.
Жұлдыз Исмаилова Қазақстанның Тәуелсіздік күніне орай Филадельфияда Ту көтеру рәсімінің өтетіні туралы қазанның басында мәлім етті.
Естеріңізге салсақ, 2021 жылы АҚШ-тың бірқатар қаласында Қазақстан Тәуелсіздігінің 30 жылдығына орай тұңғыш рет Ту көтеру рәсімі өткен болатын.
