АСТАНА. KazUnite – «Халықаралық қазақ тілі қоғамы» небары 15 күн ішінде 600 балаға қазақ тілінде тегін кино көру мүмкіндігін сыйлады.
Әр балаға ерекше қуаныш сыйлаған бұл шара әлеуметтік желіде «Qazgrammar» парақшасында бастау алды.
Анығында, әлемге әйгілі «Аватар 2: су жолы» мультфильмінің қазақша нұсқасына балаларды тегін апаруды алдымен Астана қаласындағы филиал мүшелері республикалық «Әкелер» одағымен бірлесіп бастаған болатын. Кейін бұл үрдісті «Халықаралық қазақ тілі қоғамының» Алматы облыстық филиалы Mega park ұжымы мен КАЗСМУ ЖШС құрылыс компаниясының, сондай-ақ, Алматы тілдерді дамыту жөніндегі басқарма басшысы Дәулет Шайтұрсынұлының, Ақмола облыстық филиалы «Кокшетау Энерго» ЖШС бас директоры Досымхан Аралбаевтың көмегімен, Ақтөбе облыстық филиалы жақсы жолға қойылған жарна есебінен, Қостанай облыстық филиалы жеке кәсіпкер Әсел Жұмасқалиева мен облыстық мәслихаттың депутаты Аслан Дабыловтың демеушілігімен әп-сәтте іліп әкетті. Әлбетте, әр өңірдегі шараны абыройлы атқаруға түрлі демеушілер, елге белгілі ұйымдар қолдап, жәрдемдесті.
Біздегі ең басты мақсат – балаларды қазақ тіліндегі мульттоптаманы көруге баулу, тіліміздің қолданылу аясын кеңейту, әрі, балаларға ұмытылмас көңіл-күй сыйлау. Бұл меже небары 15 күн ішінде тіпті артығымен орындалды.
Осылайша, жарты ай ішінде-ақ 600 балаға қазақ тіліндегі киноны тегін көрсете алған қазақ тілі қоғамы әлі талай игі шараға мұрындық болары хақ. Бастысы, қолдайтын халық, естір көз, тыңдар құлақ болса, болғаны.
