ВАШИНГТОН. KazUnite – Трамп әкімшілігі құжатсыз және заңсыз иммигранттарды депортациялау науқанын жалғастыра отырып, енді АҚШ-тың грин карта иелеріне назар аударды. Fox News арнасына берген сұхбатында АҚШ-тың вице-президенті Джей Ди Вэнс грин карта иелерінің құқықтарын талқылап, олардың Америка Құрама Штаттарында мерзімсіз тұру құқығына ие емес екенін атап өтті.

Жалпы, АҚШ-та грин карта иелерінің белгіленген құқықтары мен міндеттері бар.

АҚШ-тың Азаматтық және иммиграциялық қызметінің (USCIS) мәліметінше, грин карта иелерінің Америка Құрама Штаттарында тұру барысында белгілі бір құқықтар мен міндеттеріне ие.

Құқықтары:

– АҚШ-та тұрақты тұру құқығы – егер депортациялануға себеп болатын қылмыстар жасамаса;
– ⁠Кез келген заңды жұмыста істеу құқығы – АҚШ азаматтарына ғана рұқсат етілген, ұлттық қауіпсіздікке байланысты кейбір қызметтерден басқа;
– ⁠Құқықтық қорғау – Олар АҚШ-тың барлық заңымен қорғалады, соның ішінде федералдық, штаттық және жергілікті заңдар.

Міндеттері:

– АҚШ заңдарын сақтау – Федералдық, штаттық және жергілікті ережелерді қоса алғанда;
– ⁠Кіріс салығы бойынша есеп беру – Грин карта иелері табыстарын IRS-ке және штаттық салық органдарына тапсыруы қажет.
– ⁠Демократиялық басқаруды қолдау – Дауыс бере алмаса да, демократиялық қағидаларды сақтауға міндетті.
– ⁠Әскери есепке тұру – 18-25 жас аралығындағы ер азаматтар ықтимал әскери қызмет үшін Selective Service жүйесіне тіркелуі керек.