ВАШИНГТОН. KazUnite – АҚШ Мемлекеттік хатшысы Энтони Блинкен ҚР Премьер-Министрінің орынбасары – Сыртқы істер министрі Мұхтар Тілеубердімен кездесті.
Кездесу үстінде Мемлекеттік хатшы АҚШ пен Қазақстан арасында 30 жылдан бері стратегиялық әріптестік жалғасып келе жатқанын және бұл АҚШ үшін өте маңызды екенін айтты.
Бұған қоса, қазір Қазақстанда болып жатқан саяси және экономикалық реформаларды жүргізу жөніндегі маңызды күш-жігерді АҚШ тарабы барынша қолдайтынын жеткізді.
Орта Азияда аумақтық тұтастық мәселесі өзекті болып тұрғанына тоқталған Энтони Блинкен Қазақстанның Тәуелсіздігі мен біртұтастығы берік назарда болатынын атап айтты.
Ресейдің Украинаға қарсы агрессиялық соғысы Украинаның ғана емес, одан тыс мемлекеттердің, соның ішінде Орта Азия елдерінің азық-түлік, энергетика, сауда саласына елеулі зиян келтіріп отырғанын және АҚШ тарабы екінші және үшінші ретті агрессияның барлық салдарын жою үшін жұмыс жасап жатқанын айтты.
Өз кезегінде ҚР Сыртқы істер министрі Мұхтар Тідеуберді АҚЩ Мемлекеттік хатшысына Вашингтонға шақырғаны үшін және жылы қабылдағаны үшін алғысын білдірді.
Сондай-ақ ол жалпы кездесу Америка Құрама Штаттары мен Қазақстан арасындағы кеңейтілген стратегиялық серіктестікті одан әрі дамытуды көздегеніне тоқталды.
Бұған қоса, АҚШ тарабының жаһандық азық-түлік қауіпсіздігін көздейтін маңызды кездесулерге бастамашы болып отырғаны үшін де алғысын білдірді.