Шараға АҚШ-қа әр жылдары келген қазақ қауымы, ғалымдар, журналистер және жастар қауымы қатысты. Офлайн және онлайн форматында өткен кездесуді журналист Тәуірбек Бозекен жүргізді.
«Eurasian Historical Geography as Reflected in Geographical literature and in Maps from the 13th to the Mid-17th Centuries» яғни «XIII ғасырдан XVII ғасырдың ортасына дейінгі географиялық жазбалар мен тарихи карталардағы Еуразияның тарихи географиясы» атты ағылшын тілінде шыққан ғылыми монографиялық кітап Германия баспасында жарық көрді.
Ғалым Нұрлан Кенжеахмет аталған тақырыпта кітап жазу жоспары мен оны жүзеге асыру үшін 10 жылдан аса уақыт кеткенін айтады. Автор Жапония, Түркия, АҚШ сынды бірқатар елдің кітапханасындағы карталар қолданылғанын тілге тиек етті.
Тарихшы Қазақстандағы жер, су атаулары қазіргі уақытта дұрыс айтылмай жүргенін жеткізді. Тарихи карта мен қазіргі Қазақстанның картасында үлкен айырмашылық жоқ екенін де айтты.
Ғалыммен кездесу барысында ғылыми монографиялық кітаптың қазақ тіліне аударылып, Қазақстанның жоғары оқу орындары мен мектеп бағдарламаларына енгізілсе деген ұсыныстар айтылды.
Нұрлан Кенжеахмет жақында тағы бір кітабы жарық көретінін айтып өтті.
