ВАШИНГТОН. KazUnite – АҚШ Сенаты TikTok әлеуметтік желісінің иесі қытайлық ByteDance концернін басқа иелік етушіге беруге міндеттейтін заң жобасын қабылдады. Заң жобасында Қытай тарапына TikTok-ты ҚХР юрисдикциясында жоқ компанияға сату ұсынылады. Егер бұл бір жыл ішінде орындалмаса, АҚШ аумағында аталған әлеуметтік желіге тыйым салынуы мүмкін. Бұл жобаны АҚШ Конгресінің төменгі палатасы екі күн бұрын мақұлдады, деп хабарлады DW агенттігі.
TikTok-қа тыйым салу Америка Құрама Штаттарының ұлттық қауіпсіздігіне қауіп төндіруіне байланысты болып отырғанын мәлімдеді америкалық заң шығарушы орган. АҚШ-тағы сыншылар әлеуметтік желіні Қытай үкіметіне жақын және пайдаланушылардың жеке деректерін заңсыз пайдаланды деп айыптайды.
Алайда TikTok менеджменті барлық айыптауды жоққа шығарды. АҚШ-тағы әлеуметтік желіні 170 миллион адам пайдаланады, бұл – ел халқының жартысына жуық көрсеткіш.
АҚШ Сенаты барлау комитетінің басшысы Марк Уорнердің айтуынша, аталған әлеуметтік желі АҚШ, Ұлыбритания, Канада, Бразилия немесе Франция өкілдері басқарса ғана ел аумағында жұмысын жалғастыра алады.
Президент Джо Байден жаңа заңға қол қоюға дайын екенін мәлімдеді.
TikTok иелері сотта заңға қарсы шығуға ниетті. Егер TikTok-қа тыйым салынса, олар америкалықтардың өз пікірлерін еркін білдіретін платформаға қол жеткізе алмай қалатынын алға тартып, АҚШ Конституциясының бірінші түзетуінің бұзылғанын желеу етпек.