БЕРН. KazUnite – Щвейцарияның Берн қаласында Еуропада алғашқы болып клиника ашқан қазақ азаматы, бүгінде Еуропа Қазақ Дәрігерлер қауымдастығының президенті Серік Тұрсын осы елдегі клиникалардың ерекшелктері туралы айтты.

«Мұндағы дәрігерлерде екі мүмкіндік бар. Бірі  дипломын дәлелдеген соң клиникаларда жұмыс істеп, одан әрі лауазымы жоғарылай береді. Екіншісі жеке клиника ашады. Щвейцарияда Еуропа елдерінде берілген дипломдардың барлығы жарамды. Тек ЕО-ға кейіннен кірген Еуропаның шығысындағы Кеңес Одағының құрамында болған екі-үш елді қабылдамайды. Сонымен қатар шетелдіктер үшін мүмкіндік ашып, қайта жауып, оны қайта ашып отыратындығы бар. Егер тәжірибесі болған жағдайда арнайы жұмысқа қабылданады», – деді Серік Тұрсын KazUnite порталына берген сұхбатында.

Оның айтуынша, бұл елге бару үшін арнайы жұмыс орны қабылдауы керек.

«Өз басым Швейцарияға келген соң бірден клиника аштым, ешқандай кедергі болған жоқ. Қосымша 1 жылдан кейін «Ультрадыбысты зерттеу – Сонография» бойынша емтихан тапсыру керек болды. Айырмашылығына тоқталсам, Швейцарияда жекеменшік клиникалар толық дәріханалы, жартылай дәріханалы және дәріханасыз болып бөлінеді. Біздің клиника – жартылай дәріханалы. Келген пациенттерімізді тексеріп, қан талдауларының нәтижесін шығарып, дәрілерін береміз. Яғни, барлық қызмет бір жерде көрсетіледі. Ал күрделі зерттеу талдамалары орталыққа жіберіледі. Екінші айырмашылығы – әрбір қызметкердің өз алдына жұмыс жасауы. Қаралуға келген науқасты бір сағат ішінде тексеріп, рентгенге түсіріп, талдама алып, дәрісін тағайындап, қолына ұстатып жібереді. Мұндай ерекшелік көп елде, тіпті Германияның өзінде жоқ», – деді Еуропа Қазақ Дәрігерлер қауымдастығының президенті.

Серік Тұрсынмен сұхбаттың толық нұсқасын осы жерден оқи аласыз.

© Фото ашық көздерден алынды