НҰР-СҰЛТАН. KazUnite – Кәсіпкер, инвестор, «Тендер жаса» компаниясы мен «Мың батыр» даму орталығының негізін қалаушысы Азамат Серікұлы қараңғылық қанға емес, миға сіңетінін, одан арылуға болатынын айтты.

«Менің негізгі бағытым – мемлекет пен халықтың арасына алтын көпір болу. «Тарихты жазбайды, жасайды» демекші, бәлкім, тарихты жасап жатқан шығармыз. Ашығын айтсақ, қазіргі таңда ауыл-ауданды қойып, үлкен қалалардың өзінде құжатқа аса сауаты жоқ жастар аз емес. Қазақстанда жүк таситын жұмысқа, күзетшілікке, такси болуға, даяшы болуға кезекте тұрғандар көп болғанмен, дамуға ұмтылатын, мимен істейтін жұмыстарға кезекте тұрғандар аз», – деді кәсіпкер.

Оның айтуынша, қазақстандықтардың көбі  мимен жұмыс істеуден бойын аулақ ұстап, қашқақтайды.

«Сондай адамдарға өзімді үлгі қылып көрсеткім келеді. Өз басымнан мысалдар көп келтіремін. Себебі әкемнің 9 бауыр-қарындасы ауылда әлі күнге дейін біреудің малын бағады. Өскеменнің шетінде Тарбағатай тауының бөктерінде әкем де мал баққан. Біздің әулеттен мемлекеттік қызметкер, мұғалім, дәрігер болып ешкім шықпаған. Не ешқайсысында диплом да жоқ. Тіпті, жігіттер жағы әскерге де бармаған. 20 жылдан бері жұрттың малын бағумен күнелтіп келді. Бұл үрдіс балаларына дейін жалғасып бара жатты. «Қараңғылық біздің қанымызға сіңіп қалған» деп ойладық. Бірақ ол қанға емес, миға сіңіп қалған екен. Мен бүгінде сол стереотипті жойып, туыстарымызға «жұрттың малын емес, өз малымызды бағайық» деген коммерциялық ұсыныс жасадым. Қазір бәрі қолдап отыр. Алдағы 5 жылдың ішінде әулетімізді бизнестің әулетіне айналдырсам деп жоспарлап жүрмін», – деді Азамат Серікұлы KazUnite тілшісіне берген сұхбатында.

Сұхбаттың толық нұсқасын осы жерден оқи аласыздар.