НЬЮ-ЙОРК. KazUnite – АҚШ-та білім алып жүрген қазақ жігіті Жасұлан Серіков Байқоңыр қаласын туристердің орталығына қалай айналдыруға болатынын айтты.
«Мына нысан Оклахома штатының Винганон ауылының жанында орналасқан. Бұл нысанды «Сонау Ғарыштан оралған зымыран бөлігі» деп білетін көптеген жолаушы оның қасынан бей-жай өтіп кете алмай, фотоға түсуге тоқтайды. Бұл туралы жаңалықтарға шығып, бүкіл Америка жұртшылығы осы нысан туралы ақпараттан құлағдар болды. Шын мәнісінде бұл NASA-ның нысаны емес. 1971 жылы бетон араластырғыш машина жол-көлік оқиғасына түсіп, цементі қатып қалғандықтан, миксерді қалдырып, тек тракті алып кетеді. Тұрғындар бетонның ауырлығы сонша, оны қозғалтуға да мүмкін болмағанын айтады. Көп жылдар өткен соң ауыр қоқысты туристік нысанға айналдырады. Оны ғарыш зымыраны етіп бояп, жылда жаңартып отырады», – деп жазды Жасұлан Серіков Facebook аккаунтында.
Сонымен қатар ол Байқоңыр қаласында туристер көптеп келетін орталыққа айналдыруға болатынын тілге тиек етті.
«Біздің Байқоңыр қаласын туристерден көз ашпайтын орынға айналдыруға болады. Тек ол үшін осындай идеяларды қолдауға ниет керек. 10 жыл бұрын аз ғана шығынмен республикаға танымал орындарды жасауға болатын осындай идеяларды облыс әкімдігіне ұсынған болатынмын. Бірақ сол күйі ескерілмеді, ұсыныс күйінде қалды. Енді Қармақшы ауданы әкімдігі мына фотоға ұқсас бір нысан жасап бастаса екен. Алайда оған жүз миллион теңге бөлудің қажеті жоқ. Егер ондай сома бөлінсе, тағы да көзбояушылық болады. Идеяшыл жастар мұндай істі бірнеше миллион теңгеге жақсылап істеп береді деп ойлаймын. Осындай қадамдар жасалуы керек», – деп қосты ол.