Арт«Ең әдемі киім – ұлтыңның киімі» – қазақы нақыштағы киімді шетелге танытып...

«Ең әдемі киім – ұлтыңның киімі» – қазақы нақыштағы киімді шетелге танытып жүрген дизайнер

 

НЬЮ-ЙОРК. KazUnite – Киім дизайнері – ерекше мамандық түрі. Мұндағы басты қағида – дизайнердің киім үлгісі өзгелерге ұқсамауы тиіс. Сондықтан бұл сала ой жүйріктігін қажет етеді. Соңғы жылдары елімізде  дизайнерлік киім өндірісі қарқынды дамып келеді. Олар өнер туындысы іспеттес. Себебі дизайнерлік киімдер – ерекше, бірегей және сапасы жоғары. Бүгінде бұл саланы кәсіпке айналдырған жандар жетерлік. «Бизнес шахмат ойыны тәріздес. Бірнеше алғы қадамдар ойда дайын тұруы тиіс» деп америкалық кәсіпкер Тед Тернер бизнеске осылай сипаттама берген. Қазіргі таңда қазақтың салт-дәстүрін эксклюзив киім-кешек арқылы шетелге таныстырып жүрген киім дизайнері әрі жаны шығармашылыққа құмар кәсіпкер Фарида Бердіқанқызымен сұхбаттасқан едік.

Кейіпкеріміз бала күнінде қатарластары сияқты қуыршақпен емес, ине-жіппен ойнап, қайшымен дос болған. Осылайша, ине-жіпке икемі бар ол маталардан қуыршақтарына әдемі киімдер тіккен. Бүгінде Фарида заманауи әрі қазақы нақыштағы киімдерді елімізде ғана емес, шетелде де паш етіп жүр.

– Фарида ханым, сіз бала күніңізде ине-жіппен ойнап өскен екенсіз. Сол кезден бастап дизайнер болғыңыз келді ме?

1975 жылы Ақтау қаласында дүниеге келдім. Дарынды балаларға арналған мектеп-интернатында білім алдым. Бала кезімнен өнерге құштар болдым. Әсіресе, спорт пен би өнеріне қатты қызықтым. Сондай-ақ мектеп кезінен бастап кесте тігіп, сурет салғанды ұнатамын. Қатарластарым қуыршақпен ойнап жүргенде, мен үйде әжемнің жанында инесін сабақтап беретінмін. Сөйтіп, бірте-бірте тігін тігуді үйрендім. Сондай-ақ әпкелерім киіз басумен айналысты. Оларды көріп, мен қолөнерге жақын болдым. Есейе келе, ою-өрнекке қызығушылығым оянды. Әлбетте, бұл оңай жұмыс емес. Өйткені ісмер әр ою-өрнекті кестелеп, пішіннің формасын келтіріп, өрнектеу қажет. Әсіресе, ойдағы дүниені қағазға және матаға түсіру қажырлы еңбекті талап етеді.

– Дизайнерлер әрдайым ізденісте жүретіні рас. Өйткені бір киімді тігу – үлкен шаруа. Айтыңызшы, қандай да бір эксклюзив матаны кестелеуге қанша уақыт кетеді? Және ең бастысы идеяны қайдан аласыз?

Эксклюзив матаны кестелеуге шамамен 1 айдай уақыт қажет. Әлбетте, айтуға оңай. Сол процесстерден өту үшін шебер шыдамды, табанды және сабырлы болуы қажет. Ал киім-кешектерге ою-өрнектерді мен арғы ата-бабаларымыздың тарихынан аламын. Негізінен ерекше туынды жасау адамның талантына тікелей байланысты деп ойлаймын. Өзім әдемі табиғат көріністерінен шабыт аламын. Бір айта кетерлігі, мен өзгеге ұқсамайтын киімдерді тіккенді ұнатамын.

Фото Фарида Бердіқанқызының жеке мұрағатынан

– Сіздің ойыңызша, қазіргі таңда ұлттық нақыштағы киімге сұраныс қандай?

Заман өзгерсе де, ұлттық киім-кешекке және бұйымға қызығушылық та, сұраныс та жоғары.  Уақыт өткен сайын қазақтың иісі аңқыған ұлттық бренд те заманға сай жаңғырып жатыр. Байқасаңыз, қалада қыз-келіншектермен қоса ер азаматтар да күнделікті өмірде ұлттық киімді заманға сай лайықтап, киіп жүр. Олар ұлттық нақыштағы, әсіресе, жұмысқа киюге ыңғайлы киімдерді тіктіреді. Ал, біз қалаған киімді тігіп беруге әрқашан дайынбыз. Сондай-ақ, мен ойдан шығарып, қолдан түрлі әшекей бұйымдарын жасаймын. Алғашында киімдерге моншақпен кестелеп, дизайнерлік эксклюзив әзірлеп, өзім киіп жүрдім. Кейін әдемі тастармен әшекейленген бұйымдарды тағып, дизайнерлік киімді киіп, той-томалаққа бардым. Онда менен көрген әншілер ұсыныс жасап, тапсырыс бере бастады. Бүгіндеа киімдерді көнеден қалған бізкесте стильде әзірлеп, оларды біз құралы арқылы кестелейміз. Этностиль сұраныста болғандықтан, сол бағыттағы оюларды көбірек бейнелейміз.

– Дизайнерлік киімдерді қайда сатасыз?

Қазіргі кезде заттарды онлайн сатамыз. Алдағы уақытта жеке бутик ашу жоспарда бар.

– Жұмыс барысында не нәрсеге мән берген жөн?

Кез келген жұмыста қиындықтар болады. Ал егер адам өзі ұнатқан ісімен айналысса, барлық проблеманы шеше алады. Бастысы ісмер өз жұмысын жан-тәнімен сүюі қажет. Нәтижесінде ол кедергілерді еңсеріп, қиындықтарды жеңіп шығады.

– Сән өнері бойынша байқауларға қатысып тұрасыз ба?

Иә, мүмкіндігінше қатысуға тырысамын. 2016 жылы Ақтау қаласында өткен «Сән мен сахна» атты фестивальге қатыстым. Ол кезде  қатысушылар үздік киім топтамаларын көпшілік назарына ұсындық. Нәтижесінде әділ қазылар шешімімен фэшн көрсетілімде туындыларым үздік деп танылып, жеңімпаз атандым. Сондай-ақ Түркияда өткен сән фестиваліне де жолдама ұтып алдым.

– Қандай жетістіктеріңіз бар?

Қазақстан атынан шетелде халықаралық деңгейдегі сән көрсетілімдеріне қатысып тұрамын. Мұндағы басты мақсат – ұлттық брендімізді өзге елдерге кеңінен насихаттау. Осы уақытқа дейін Ыстамбұл, Милан, Дубай және басқа да елдердегі қалаларда дизайнерлік киім көрсетілімдеріне қатысып, дипломдармен марапатталдым. Бір айта кетерлігі, бұған мемлекет тарапынан ешқандай қаржылай көмек болмады. Барлық іс-шараға өз қаражатыммен қатыстым.

Фото Фарида Бердіқанқызының жеке мұрағатынан

– Шетелде өтетін сән көрсетілімдеріне қатысудағы басты мақсатыңыз қандай?

Қазақта «Ең әдемі киім – ұлтыңның киімі» деген жақсы сөз бар. Бүгінгі таңда қазақы нақыштағы киім-кешек заманға сай лайықталып, сәнге айналды. Бұл – қуантарлық жайт. Ал оны қазақтың қаракөз қыздары ұлттық брендке айналдыру үшін үлес қосып жүр. Сондай ұлттық құндылықтарымызды насихаттап жүрген ісмер және шеберлерді көргенде іштей риза болмайтын адам кемде-кем шығар. Мен солардың бірі болғаныма қуанамын. Өзге елде ұлтымның салт-дәстүрін басқаға ұқсамайтын әрі бірегей туындылар арқылы таныстырып, көпшілікке көңінен насихаттағым келеді, насихаттап та жүрмін.

Фото Фарида Бердіқанқызының жеке мұрағатынан

– Фарида Бердіқанқызы, бұл кәсіппен айналысу үшін адамның бойында қандай қасиеттер болуы керек?

Қолға алған кез келген ісіңіз нәтижелі болғанын қаласаңыз, мақсатыңыз айқын болуы тиіс. Сондай-ақ сол мақсатқа жету жолында қажырлы еңбек етуіңіз қажет. Бұл кәсіп адамнан табандылықты, шыдамдылық пен ізденісті талап етеді. Бастысы қызығушылық болуы керек. Сол кезде ғана қиындықтарды еңсеріп, мақсатыңызға жетесіз.

– Табысты болу үшін не істеу қажет?

Табысты болу үшін адам сол кәсіпке жан-тәнімен беріліп жұмыс істеуі тиіс. Үздіксіз ізденіп, еңбек ету керек. Кез келген жетістік кәсіпкердің еткен еңбегіне тікелей байланысты екенін естен шығармаған жөн.

– Өмірлік ұстанымыңыз қандай?

– Менің өмірлік ұстанымым – «Еңбек – бәрін де жеңбек». Менің ойымша, кез келген адам өмірде әрекет етсе, береке табады. Сондықтан «Әрекет түбі –берекет» екенін білейік және басқаларға үлгі болайық!

Фото Фарида Бердіқанқызының жеке мұрағатынан

– Бос уақытыңызда немен шұғылданасыз?

– Шынымды айтсам, менде бос уақыт мүлде болмайды. Мен үнемі ізденіс үстінде жүремін. Сонымен қатар сурет саламын және кестелер тігемін.

– Алдағы жоспарларыңыз туралы айта кетсеңіз…

– Жоспар өте көп. Ілгеріде айтқанымдай, қазіргі таңда заманауи стильдегі қазақы киімдерге сұраныс бар. Сондықтан сатылымға шығаратын орындар іздеу керек. Сондай-ақ түрлі көрмеге қатысуды жоспарлап отырмын. Оған қоса, алдағы уақытта мемлекет тарапынан берілетін қаржылай гранттарға өтініш беремін.

– Фарида ханым, сұхбатыңызға рақмет. Сізге шығармашылық табыс, ісіңізге береке тілеймін! 

P/S: ауыл шаруашылық, кәсіпкерлік саласында қажырлы еңбектің арқасында жетістікке жеткен және қарапайым еңбек адамдарын дәріптеу тұрғысында
«Қазақстандық қоғамдық даму институты» КеАҚ «Кәсіби шеберлерді таны» жобасын қолға алды.

Мемлекет басшысы Қасым-Жомарт Тоқаев «Еңбекқорлық біздің негізгі құндылығымыз  болуы қажет. Оны ұлт сипатын айқындайтын асыл қасиетке айналдыруға тиіспіз» деп адал еңбектің басты құндылық екеніне ерекше назар аударған болатын.

Ақкербез МЫРЗАХМЕТ

 

Соңғы жазбалар

Қазақстан ҰҚШҰ-дан шығуға мәжбүр болуы мүмкін – саясаттану профессоры

0
НЬЮ-ЙОРК. KazUnite - Саясаттану профессоры Полин Джонс жақында CDDRL және TEC бірлесіп ұйымдастырған Reds семинарында сөйлеген сөзінде Украинадағы Ресейдің жаңарған агрессиясы Мәскеудің Еуразиялық көршілерімен...

Қытай мен Астана хабы мемлекеттік басқару бойынша жаңа жобалар талқылауда

0
Астана Мемлекеттік қызмет хабы Басқарушы комитеті төрағасы Алихан Байменов пен Қытай ұлттық мемлекеттік басқару академиясы атқарушы Вице-президенті Си Чунтао екіжақты ынтымақтастық мәселелерін талқылады. Кездесуге ҚХР-ның...

«New York Fashion Week-2024» халықаралық сән көрсетілімінде Қазақстанның Әнұраны шырқалды

0
Нью-Йорк қаласындағы «Leman Ballroom» залында  «New York Fashion Week-2024» халықаралық сән көрсетілімінің 16-маусымы ашылуында қазақстандық дизайнердің ұлттық сән үлгілері ұсынылып, қазақ әншісі өнер көрсетті,...

Шетелдіктер асырап алған қазақ балаларының Қазақстанға оралатыны рас па?

0
KazUnite - Кезінде шетелдіктер асырап алған қазақ балалары Қазақстанда біраз уақыт білім алып, қазақ тілін үйренеді. Бұл туралы «Шетелдегі қазақ балалары» жобасының авторы, белгілі...

Қазақ тілі Испания патшалығында да үйретілетін болды

0
KazUnite - «Tildes.kz» клубының филиалы өз мүшелерінің сұранысы аясында Испания Патшалығында да ашылды. Аталған клуб іргетасы 2022 жылы Халықаралық «Қазақ тілі» қоғамы Астана қалалық...