АСТАНА. KazUnite – Жақында қазақтың әуесқой спортшысы АҚШ-тың Чикаго қаласында өткен дүние жүзілік марафонға барды.

Адам қарасы қалың. Чикаго әуежайынан түскен бойда артынып-тартынып, кедендік бақылауға қарай нөпір халықтың ішінде кетіп бара жатқан қазақтың алдындағы бір жолаушының құжаты жерге түсіп қалады. Қазақ жігіті құжатты алып қараса, Украина паспорты екен. Иығындағы сөмкесі ауыр, алдындағы кісі жылдам кетіп барады, қуып жету мүмкін емес сияқты. Сол-ақ екен:

– «Слава Украине!» – деп дауыстайды қазақ жігіті. Бар ойы әлгі паспорт иесін тоқтату еді.

Бірақ сол сәтте бір емес, айналасындағы бірнеше адам қазақ жігітіне жалт қарайды. Қарағандардың бәрі украиналық болса керек. Соғыс басталғалы пана іздеп, АҚШ-қа барып жатқан Украина азаматтары аз емес.

Сонда қазақ жігіті өзіне жалт қарап, сәл кідірген азаматтардың ішінен паспорт иесіне қарай жүреді. Әлгі адамның қуанышын көрсеңіз, көзі мөлтілдеп, жасқа толып тұр. Қазақ жігітін құшақтай алады. Паспортының табылғанына бір қуанса, қазақ жігітінің ұранды сөзіне қалай риза болмасын?!

Сөйтіп, Чикаго әуежайында біздің спортшы украиналық азаматтардың көңіл төрінен орын алыпты.

Ол – белгілі марафоншы Еренғайып Қуатайұлы еді.