НЬЮ-ЙОРК. «Kazunite» компаниясының «Тұлға инженериясы» жобасы аясында 6-12 жас аралығындағы балаларға арналған «Менің армандарым» атты күнделік-журналы жарыққа шыққан журнал.
Күнделік-журналда балалардың ойлау жүйесін дамытып, өзін және өмірді түсінуге, алдына айқын мақсаттар қоя білуге және соған ұмтылуға баулитын мотивациялық әңгімелер мен психологиялық жаттығулар қамтылған. Мұны қолына алған әрбір бала өзінің арман-мақсатын жазып, берілген сұрақтарға жауап бере отырып, тапсырмаларды бояйды.
Қазақстандық балаларға арналған жаңа жобаның авторлары – белгілі журналист, бірнеше танымдық кітаптың авторы, бүгінде АҚШ-тағы «Kazunite» компаниясының негізін қалаушы Нәзира Байырбек пен «Астана ақшамы» газетінің шолушысы Гүлмира Аймағанбет.
«Біз, осы журналды дайындаған екі автор, біріміз – Қазақстанда, біріміз – Америкада тұрамыз. Осылайша, жұмыс істеп, оқып, өзімізді дамытып жүріп, қазақтың ботақандары алда қазіргіден де дамыған, жақсы өмірге лайық болса деген ақ тілекпен журналды дайындадық. Журналистикада жиырма жылдай қызмет етіп, әлем елдерінің біразын көріп, өзіміз де біріміз бес, біріміз алты бала өсіріп, «Қалай балаларымызды мықты адам етіп тәрбиелесек екен?» деген сұрақпен ізденген анамыз. Бұл журналды дамыған елдердегі жоғары деңгейлі қоғамға лайық бала тәрбиелеу тәжірибелерін көріп отырып, жасадық. Журналға өз балаларымызға қолданған тәжірибелерді де қостық», – деді авторлар.
Айта кетсек, KazUnite халықаралық порталы – АҚШ-та (Нью-Йорк қаласы) ашылған тұңғыш қазақ басылымы.
