СЕМЕЙ. KazUnite – Семей қаласының тарихы Әбілпейіз сұлтаннан бастау алады. Бұл туралы Назарбаев университеті түркітану және қазақ тілі кафедрасының оқытушы ассистенті Айдын Жүнісханов Семейде өткен «Әбілпейіз сұлтан – XVIII ғасырдағы көрнекті мемлекет қайраткері» атты ғылыми-танымдық конференцияда мәлімдеді.
«Әбілпейіз сұлтан кезінде ұмыт болып қалған Қола дәуіріндегі ескі жолды қайта жандандырған болатын. Екіншіден, Әбілпейіз сұлтан айырбас үйін салу арқылы Семей қаласының негізін қалады деуге болады. Шын мәнінде бүгінгі Семей қаласының тарихы Әбілпейіз сұлтанмен басталуы керек. Өйткені тарихи деректер соған саяды. Бұл біздің ұлттық мүддемізге де сай келеді. Қаладағы қазіргі ұзын көпір де Әбілпейіз сұлтанның заманындағы Шығыс пен Сібірді байланыстырып тұрғандай өзіндік үлкен рөл атқарып тұр. Сондықтан бұл ұзын көшеге де Әбілпейіз сұлтанның атын беру орынды деп санаймыз. Себебі 3 ғасыр өтсе де, Әбілпейіз сұлтанның жолы өзінің маңыздылығын әлі де жоғалтқан жоқ, Семейдегі маңызды жолдың бірі», – деді Айдын Жүнісханов өзінің баяндамасында.
Сонымен қатар аталған конференцияда Шәкәрім атындағы Семей университетінің профессоры, тарих ғылымдарының кандидаты Мұхтарбек Кәрімов «Әбілпейіз сұлтан: тарих және тұлға», Қазақстан жазушылар одағының мүшесі, Халықаралық Шыңғысхан академиясының академигі Жәди Шәкенұлы «Қытай деректеріндегі Әбілпейіз және Көгедайға қатысты кейбір мәліметтер», «Кетбұқа-Төлегетай» халықаралық қоғамдық қорының тарих пен мәдениетті балама зерделеу жобасының жетекшісі Айбек Кәрімов «Шыңғыстау-Аякөз өңірінде қалыптасқан «Билер кеңесі – Төре» басқару жүйесі», тарихшы, өлкетанушы Мұхаметбек Асылбеков «Сыбанқұл сұлтан бастаған Әбілпейіз ұрпақтарының XIX ғасырдың алғашқы жартысындағы отаршылдыққа қарсы күресі» тақырыбында баяндамалар жасады.
