ФИЛАДЕЛЬФИЯ. KazUnite – Бүгін, 15 желтоқсан күні Филадельфия қаласында Қазақстан Тәуелсіздігінің 31 жылдығына орай Ту көтеру рәсімі өтеді.
Айта кетсек, АҚШ-тың Пенсильвания, Нью-Йорк штаттары Қазақстаннан 11 сағатқа артта. Яғни іс-шара Пенсильвания уақытымен таңда басталады.
Таңғы сағат 10.00-ден бастап Қазақстанның және АҚШ-тың жалаулары бар автомобильдер кортежі Бастлтон авенюден қала орталығына дейін жүріп өтеді.
Ту көтеру рәсімі Муниципалдық қызмет ғимаратында ұйымдастырылады. Мерекелік іс-шараға Филадельфия қаласының әкімшілігі және Қазақстанның АҚШ-тағы елшілігі мен Нью-Йорктағы Консулдығының өкілдері қатысады.
Белгілі композитор, әнші Марат Омаров бастаған Мирас Жүгінісов, Тұрар және АҚШ-тағы қазақ жастары Әнұранымызды шырқап, күй тартып, жетіген, қобыз, пианино, сыбызғы аспаптарында ойнап, өз өнерлерін паш етеді.
Сонымен қатар Қазақсатнның белгілі дизайнері Айдана Омарова бастауымен сәнгер (модельер) қыз-жігіттер ұлттық нақыштағы киімдермен сән үлгісін көрсетеді.
Естеріңізге салсақ, бұған дейін осынау іс-шара туралы бас ұйымдастырушылардың бірі Пенсильваниядағы Қазақ Ассоциациясының Президенті Жұлдыз Исмаловамен сұхбат құрған болатынбыз.
Филадельфияда өтетін мерекелік іс-шара туралы «Qazaqstan» және «Хабар» телеарналарының АҚШ-тағы меншікті тілшілері оқиға орнынан ақпарат тарататын болады.
