ۆاشينگتون. KazUnite – قازاقستاننىڭ امەريكا قۇراما شتاتتارىنداعى ەلشىلىگى ۱ ماۋسىمدا “قازاقستان كونستيتۋتسياسىنا وزگەرىستەر مەن تولىقتىرۋلار قابىلداۋ ماسەلەسى بويىنشا الداعى رەسپۋبليكالىق رەفەرەندۋم” تاقىرىبىندا ونلاين كەزدەسۋ وتكىزدى. وعان قازاقستاننىڭ اقش-تاعى ەلشىسى ەرجان اشىقباەۆ جانە اقش-تا تۇراتىن، ءبىلىم الىپ جاتقان قازاق ازاماتتارى مەن باق وكىلدەرى قاتىستى.
ونلاين كەزدەسۋ كەزىندە رەفەرەندۋمعا قاتىسۋ ءۇشىن قايدا بارۋ كەرەگىن، كونستيتۋتسياداعى پرەزيدەنتتىڭ قۇزىرى جايلى سۇراقتار قويىلدى.
امەريكاداعى قازاق ازاماتتارى قر ەلشىلىگى وكىلدەرىنە تاقىرىپتان تىس سۇراقتار دا قويدى. سونىڭ ىشىندە، قاڭتار وقيعاسى جايلى سۇراعاندار بولدى. ەڭ كوپ قويىلعان سۇراقتار قازاقستانداعى مەملەكەتتىك ءتىلدىڭ تاعدىرىنا بايلانىستى بولدى. اتاپ ايتساق، كونستيتۋتسيانىڭ ۷-بابىنىڭ ۲-تارماعىن الىپ تاستاۋ، قازاقستاندا مەملەكەتتىك قىزمەتكە قابىلداردا جانە قر ازاماتتىعىن بەرەردە ۇمىتكەردەن ەل تاريحى مەن مەملەكەتتىك ءتىلدى ءبىلۋىن تالاپ ەتۋ جايلى سۇراق ءجيى قويىلدى.
ونلاين جيىندا kazunite.com-نىڭ اقش-تاعى وكىلدەرى دە ءوز سۇراقتارىنا جاۋاپ الدى.
اقش-تىڭ كەيبىر جوو-نىڭ فيليالىن قازاقستاندا اشۋ جوسپاردا بار ەكەنى بۇدان بۇرىن ايتىلدى. بۇل جوسپار قاشان ىسكە اسادى جانە قانداي ۋنيۆەرسيتەتتەردىڭ فيليالى اشىلماق دەگەن سۇراققا ەلشىلىك وكىلى جاۋاپ بەردى. ال قازاقستان جاستارىنا ەلدەن شىقپاي-اق اقش ۋنيۆەرسيتەتتەرىندە وقۋ مۇمكىندىگىن تۋدىرۋ، سونىڭ ىشىندە اقش ۋنيۆەرسيتەتتەرىنىڭ فيليالدارىن اشۋ ماسەلەسى بويىنشا سۇراعانىمىزدا ازىرگە تەك سولتۇستىك قازاقستان ۋنيۆەرسيتەتى مەن اريزونا مەملەكەتتىك ۋنيۆەرسيتەتى اراسىندا كەلىسىم جاسالىپ جاتقانىن، بيىل كۇزدە قۇجاتتاردى دايىنداۋ مەن كەلىسسوز جاساسۋ پروتسەسى اياقتالۋى مۇمكىن ەكەنى ايتىلدى.
قازاقستاننىڭ اقش-تاعى ەلشىلىگى بولاشاقتا اقش-تاعى قازاقتاردىڭ باسىن قوساتىن ءىس-شارالاردى وتكىزۋ جوسپاردا بار ەكەنىن جەتكىزدى.