نۇر-سۇلتان. KazUnite – “بولاشاق” حالىقارالىق ستيپەندياسى ۱۹۹ قازاقستاندىققا بەرىلدى. وتكەن جىلى ينجەنەرلىك-تەحنيكالىق ماماندىقتارعا ۳۶٪، بيىل ۶۰٪ ستيپەنديا ءبولىندى. بۇل تۋرالى قر مەملەكەتتىك كەڭەسشىسى ەرلان قارين ءمالىم ەتتى.
“شەتەلدە كادرلار دايارلاۋ جونىندەگى رەسپۋبليكالىق كوميسسيانىڭ كەزەكتى وتىرىسى ءوتتى. كوميسسيا شەشىمىمەن “بولاشاق” حالىقارالىق ستيپەندياسى ۱۹۹ قازاقستاندىققا بەرىلدى. ولار ماگيستراتۋرا مەن دوكتورانتۋرادا وقيتىن بولادى. پرەزيدەنت قاسىم-جومارت توقاەۆتىڭ “بولاشاق” باعدارلاماسىن قايتا باعدارلاۋ جونىندەگى تاپسىرماسىنا سايكەس، ينجەنەرلىك-تەحنيكالىق كادرلاردى دايارلاۋعا باسا ءمان بەرىلدى. ەگەر وتكەن جىلى ينجەنەرلىك-تەحنيكالىق ماماندىقتارعا ۳۶٪ ستيپەنديا بولىنسە، بيىل ۶۰٪ ءبولىندى”، – دەپ جازدى ەرلان قارين Instagram اككاۋنتىندا.
ونىڭ سوزىنشە، مەديتسينالىق باعىتتاعى اكادەميالىق باعدارلامالارعا ۇمىتكەرلەردىڭ قولجەتىمدىلىگىن جانە قىزىعۋشىلىعىن ارتتىرۋ ماقساتىندا رەسپۋبليكالىق كوميسسيا مەديتسينا قىزمەتكەرلەرىن اكادەميالىق وقىتۋ ءۇشىن جەكە سانات ءبولۋ تۋرالى شەشىم قابىلدادى.
