الماتى. KazUnite – قازاق ءتىلى بارلىق داعدارىستى ەڭسەردى. ەندى ول ماڭگى جاسايدى. سەبەبى الەمدىك بيزنەس پروتسەسستەرىندە قازاق ءتىلىن ەلەۋ، ساناسۋ ترەندى باستالدى. بۇل تۋرالى ەكونوميكا، قارجى سالاسىنىڭ ساراپشىسى ايبار ولجاەۆ مالىمدەدى.
“Apple ءوزىنىڭ IOS وپەراتسيالىق جۇيەسىنە قازاق ءتىلىن سيستەمالىق ءتىل قىلىپ ەنگىزىپ وتىر. اقش ىشكى جالپى ءونىمىنىڭ ۶ پايىزىن بەرىپ وتىرعان Apple – الەمدە Saudi Aramco-دان كەيىنگى ەڭ قىمبات كومپانيا. ال Iphone – ەڭ اتاۋلى سمارتفون. قازاق ءتىلىنىڭ وعان ءىلىنۋى – ونىڭ بولاشاعىنا دەگەن حالىقارالىق سەنىمنىڭ بەلگىسى”، – دەپ جازدى ايبار ولجاەۆ Facebook-تە.
ونىڭ سوزىنشە، مامىر-ماۋسىم ايلارى قازاق تىلىنە كوپتەگەن جاقسى جاڭالىق اكەلدى. Apple-دەن بولەك، Nickelodeon دا قازاقشاعا اۋىسقانى ءمالىم بولدى.
“قازاقتىلدى كوممۋنيكاتسيا مامانى بولعاندىقتان، بيىلدان باستاپ ءتىلى قازاقشالانباعان كوپتەگەن الەمدىك ءىرى برەند، كومپانيالار تاراپىنان كەڭەس سۇراۋ، اۋديتوريانىڭ ەرەكشەلىكتەرىن بىلۋگە دەگەن سۇرانىستار كوبەيدى. سوندىقتان ترەند دەگەندە – مەن شىنىمەن دە كوزبەن كورىپ، قولمەن ۇستاعان نارسەمدى ايتىپ وتىرمىن”، – دەدى ساراپشى.
