نيۋ-يورك. KazUnite – الەمدەگى ەڭ باي ادام يلون ماسك TED كونفەرەنتسياسىنىڭ باس ۇيىمداستىرۋشىسى كريس اندەرسونعا بەرگەن سۇحباتىندا ءوزىنىڭ ءۇيى بولماعاندىقتان، دوستارىنىڭ ۇيىندەگى بوس بولمەلەرىندە تۇنەپ جۇرگەنىن ايتتى.
“مەندە قازىر ءتىپتى ءوزىمنىڭ جەكەمەنشىك ءۇيىم جوق. كوبىنە دوستارىمنىڭ ۇيىنە ايالدايمىن. ەگەر Tesla-نىڭ ينجەنەرلىك جۇمىستارىنىڭ باسىم بولىگى ورنالاسقان اۋدانعا بارسام، نەگىزىنەن دوستارىمنىڭ ۇيىندەگى بوس بولمەلەردى قاراستىرامىن”، – دەدى ماسك دۇيسەنبى كۇنى جاريالانعان سۇحباتتا.
Bloomberg دەرەگىنشە، قازىرگى ۋاقىتتا ماسكتىڭ كاپيتالى ۲۵۱ ميلليارد دوللارعا تەڭ دەپ باعالانادى.
بۇل رەتتە سەناتور ەليزابەت ۋوررەن سياقتى امەريكالىق زاڭ شىعارۋشى ورگاندار وكىلدەرى ماسك سياقتى مەگاميللياردەرلەردىڭ سالىق تولەۋ ەسەبى سالىستىرمالى تۇردە تومەن ەكەنىن العا تارتىپ، ۇنەمى سىنعا الادى.
“ارينە، ەگەر مەن ميللياردتاعان دوللاردى جىل سايىن ءوزىمنىڭ جەكە قاجەتتىلىكتەرىمە جۇمساسام، ماسەلە تۋىندار ەدى. بىراق ولاي ەمەس”، – دەدى ماسك.
ول ءوزىنىڭ ياحتاسى جوق ەكەنىن، جەكە ۇشاعى بولسا دا، شىنىمەن دەمالىسقا بارمايتىنىن تىلگە تيەك ەتتى.
“بۇل – مەنىڭ جەكە قاجەتتىلىكتەرىمنىڭ شىعىنى قىرۋار قارجى دەگەن ءسوز ەمەس. مەندە ۇشاق بار. بىراق ەگەر دە مەن ۇشاقتى قولدانسام، وندا جۇمىس ىستەۋگە ۋاقىتىم از قالادى”، – دەدى ول.
۲۰۲۰ جىلدىڭ مامىرىندا ول تۆيتتەردە ءوزىنىڭ بار مۇلكىن ساتپاق نيەتى بار ەكەنىن، بۇدان بىلاي ءۇيى بولمايتىنىن جازعان. ۲۰۲۱ جىلدىڭ تامىزىندا Insider ماسكتىڭ SpaceX-تەن جالعا العان ۵۰ مىڭ دوللار تۇراتىن قۇرامالى ۇيدە تۇرىپ جاتقانىن مالىمدەگەن بولاتىن.
جاقىندا Vanity Fair-عا بەرگەن سۇحباتىندا ماسكتىڭ سەرىكتەسى گرايمس ونىڭ كەي كەزدەرى كەدەيلەر كەيپىندە ءومىر سۇرگەنىن ايتتى.
ال ۲۰۱۵ جىلى Google-دىڭ نەگىزىن قالاۋشى، سول كەزدەگى باس ديرەكتورى لارري پەيدج ماسك سيليكون القابىنا بارعان كەزدەردە ونىڭ ەلەكتروندى پوشتاسىنا: “مەن بۇگىن كەشكە قايدا توقتايتىنىمدى بىلمەيمىن. سەندەرگە كەلسەم بولا ما؟” دەپ جازاتىنىن ايتقان بولاتىن.
ەستەرىڭىزگە سالساق، بۇعان دەيىن يلون ماسكتىڭ تۆيتتەردى ساتىپ الۋعا ۇسىنىس جاساعانىن حابارلاعان بولاتىنبىز. اندەرسونعا بەرگەن سۇحباتىندا ول Twitter ۇسىنىسىنا باس تارتقان جاعدايدا قوسىمشا جوسپارى بار ەكەنىن ايتتى. بىراق جوسپارى تۋرالى تولىعىراق ەشتەڭەنى اشىپ ايتپادى.
دەرەككوز: businessinsider.com
© فوتو اشىق كوزدەردەن الىندى
