مەلبۋرن. KazUnite – تيكتوك ارقىلى شەتەلدىكتەر اراسىندا اسا تانىمالدىلىققا يە بولعان قازاق بالاسىن ەستىدىڭىز بە؟ ول – شەتەلدىك تەلەارنالار جارىسا سۇحبات الىپ جۇرگەن اۋستراليانىڭ مەلبۋرن قالاسىندا تۇراتىن رۋستام رازيەۆ.
رۋستام سۋپەرماركەتتەردە بوگدە ادامنىڭ تاۋار اقىسىن ودان بۇرىن كارتاسىمەن تولەپ بەرىپ، كوپشىلىكتىڭ العىسىن الۋدا. ادامداردىڭ ەموتسياسىن تيكتوكتاعى ءوزىنىڭ اككاۋنتىنا جۇكتەپ، سودان ميلليونداعان قارالىم جيناپ ءجۇر.
تيكتوكتا قازىر ۷ ميلليونعا جۋىق جازىلۋشىسى بار رۋستام رازيەۆتىڭ جەلى ارقىلى كوپشىلىككە تاراعان قايىرىمدىلىق ىستەرى تۋرالى شەتەلدىك باسىلىمدار جارىسا جازۋدا.
رۋستاممەن ءبىز دە بايلانىسقا شىعىپ، بىرەر سۇراعىمىزدى جولدادىق. ۱۹۹۱ جىلى الماتىدا دۇنيەگە كەلگەن ول ۱۶ جاسىندا شەتەلدە وقۋعا اتتانىپتى. سودان جىلىنا ۱-۲ رەت ەلگە كەلىپ ءجۇرىپتى. سوڭعى رەت قازاقستاندا ۴ جىل بۇرىن بولىپتى.
“مەن بروكەر-كونسۋلتانتپىن. بالا كەزىمدە وتباسىمىزدا تۇرمىستىق قيىندىقتار بولدى. اتا-انام، اپكەم ءبارىمىز ءبىر بولمەلى پاتەردە تۇردىق. تاماققا اقشا جەتپەگەن كەزدەر دە بولدى. سول ءۇشىن دوستارىمدى ۇيگە شاقىرۋعا ۇيالاتىنمىن. بۇل جاعداي مەنى ءبىراز ويلاندىردى. كەيىن اقشام بولعاندا ادامدارعا ازىق-تۇلىك ساتىپ الۋعا، جالپى قولىمنان كەلگەنشە كومەكتەسەمىن دەپ ءوز-وزىمە ۋادە بەردىم. ارينە، ءبىر كەزدەرى تۇرمىستىق جاعدايىمىزدىڭ تومەن بولعانى ءۇشىن وكىنبەيمىن. ول جاعداي مەنىڭ بويىمدا جاقسى قاسيەتتەردىڭ بولۋىنا پايداسىن تيگىزدى. سىزدەرگە دە بار جاقسىلىقتى تىلەيمىن”، – دەدى رۋستام رازيەۆ KazUnite تىلشىسىنە.
رۋستام رازيەۆ KazUnite وقىرماندارىنا ارنايى ۆيدەو سالەم جولدادى.