Home Blog

“قاي جەردە ەمەس، قانداي اقپارات ايتقانىڭ ماڭىزدى”: New York Film Academy قۇندىلىعى نەدە

Фото Арай Канапьяеваның жеке мұрағатынан
Тарату:

نيۋ-يورك. KazUnite – “Qazaqstan” ۇلتتىق تەلەارناسى “تاڭشولپان” تاڭعى اقپاراتتى-سازدى باعدارلاماسىنىڭ جانە اۋا رايى بولجامىنىڭ جۇرگىزۋشىسى، “بولاشاق” حالىقارالىق ستيپەندياسىنىڭ يەگەرى، New York Film Academy تۇلەگى اراي كاناپياەۆانىڭ نيۋ-يورك قالاسىنداعى New York Film Academy تۋرالى اۆتورلىق ماقالاسىن وقىرمان نازارىنا سول قالپىندا ۇسىنامىز.

ۇستازدار “اياساڭ، اياما” قاعيداسىن ۇستانادى

New York Film Academy-دە ءبىلىم الۋ كەزىندە مي ەرىكسىز شيرادى. كۇندەلىكتى بىرقالىپتى ومىردەن شىعۋ ءوز الدىنا، جاڭا داعدىلاردى ۇيرەنۋ ءتىپتى ابىگەرگە سالدى. نەگە دەسەڭىز، ماسەلەنىڭ ءمانىسى مىنادا جاتىر، بۇعان دەيىن ەلدە تەلەارنادا تەك ەفير جۇرگىزۋمەن شەكتەلمەي، سيۋجەت رەداكتورى، قوناق رەداكتورى، ۇيلەستىرۋشى سياقتى قىزمەتتەرىن اتقارىپ، مونتاج، ءتۇسىرىلىم، كوديروۆكا سياقتى جۇمىستاردى كوردىم. بەت بويايتىن دا شارۋا قولدان كەلەتىن. بىراق ۲۰ كەلىلىك كامەرانى قولدا ۇرشىقشا اينالدىرامىن دەگەن وي ءۇش ۇيىقتاسام، تۇسىمە كىرمەپتى. “قاجەت بولسا، تۇسىرە الاسىڭ” دەسە دە، سەنبەس ەدىم. وسى رەتتە “ادامنىڭ جاساعانىن ادام جاساي الادى” جانە “شىن، قالاساڭ، جاسايسىڭ” دەگەنگە كوزىم انىق جەتتى.

سونىمەن، اكادەمياداعى العاشقى كۇن تانىسۋ فورماتىندا ءوتتى. كىرىسپە ساباقتىڭ ەرتەسىندە ۇستاز Daniel Hernandez-Alonzo كامەرانىڭ جالپى قۇرىلىسىمەن، نەگىزگى تەكتىكتەرىمەن، فۋنكتسياسىمەن تانىستىرىپ، ۱۲ ستۋدەنتتى ۴ توپقا ءبولىپ، ءبىر-ءبىر قارا جاشىكتى قولىمىزعا ۇستاتىپ قويا بەردى. العاشقى تاپسىرما ۶۰ سەكۋندىق كسم ءتۇسىرۋ بولدى. العاشقى تۇسىرىلىمگە مۇعالىم ءوزىنىڭ اسسيستەنتىمەن بىرگە شىقتى. “كومەكتەسەتىن شىعار” دەپ ويلاعانمىن. جوق، “اياساڭ، اياما” قاعيداسىن ۇستاندى ما، كامەرانى قولعا بەردى دە، الىستان باقىلاپ وتىردى. قانشا قاسارىسسا دا، ميعا بۇل اقپاراتتى قابىلداۋعا تۋرا كەلدى.

بۇل عانا ەمەس، جارىق قويۋ جانە ونى پايدالانۋ، ميكروفون مەن پەتليچكانى قولدانۋدى دا مەڭگەردىك. ادام بۇلشىق ەتىنىڭ ەستە ساقتاۋ قابىلەتى (مىشەچنايا پاميات) سونشالىقتى مىقتى ەكەن عوي، كۇندەلىكتى ءبىر نارسەنى قايتالاي بەرىپ، العاشقىدا اۋىر دەگەن كامەرانى از ۋاقىت ىشىندە شاشىپ، قايتا قۇرايتىنداي دەڭگەيگە جەتتىك. مونتاج جاساۋدا دا تۋرا سونداي دەڭگەي. ماتەريالعا العاشىندا كوزىمىز باقىرايا قارايتىن ەدىك، ۋاقىت وتە كەلە، ۆيدەونى سارت-سۇرت كەسكىلەپ، كەلىستىرەتىن دەڭگەيگە قادام باستىق.

جالپى، وقۋ بارىسىندا ءار ستۋدەنت ءبىر ءوزى ءتۇسىرۋ، كەيىپكەرمەن كەلىسۋ، مونتاج، كسم جازۋ، دىبىستاۋ، دىبىستى تازالاۋ سياقتى داعدىلاردى مەڭگەردى. كونۆەرگەنتتى جۋرناليستيكامەن جاقىننان تانىستىق. ول ازداي اۋديو پودكاست جاساپ، امەريكالىق ستاندارتقا ساي جاڭالىقتار توپتاماسىن جاسادىق. ءوز باسىم جاڭالىقتاردى اعىلشىن تىلىندە جۇرگىزىپ، پروديۋسەر جانە ونىڭ اسسيستەنتى قىزمەتىن قاتار اتقارىپ كوردىم. ءسوز جوق، مىقتى تاجىريبە بولدى.

ءمۇيىزى قاراعايداي مايتالمان ماماندار ءدارىس وقىدى

وقۋ بارىسىندا ادامدارمەن قارىم-قاتىناس ءتىلىن قايتا ۇيرەنگەندەي بولدىق. ويتكەنى تۇسىرىلىمگە قاجەتتى كەيىپكەر تابۋ ءۇشىن ۇنەمى ىزدەنىس ۇستىندە جۇردىك. قازاقستانداعىداي “ءنومىرىن بەرشى، سۇراپ بەرشى” دەۋ جوق. ءبارى بوتەن، ءبارى بەيتانىس. تانىسىپ، ءبىلىسىپ، كونتاكت كوبەيە ءتۇستى.

پراكتيك ماماندار ءدارىس وقىدى. ماسەلەن، Zlatka Andorova. ول – promo editor، freelancer، ياعني بىزشە ايتقاندا، انونس جاسايتىن مامان. وسىدان ۱۱ جىل بۇرىن Facebook-قا ۵ سەكۋندتىق روليكتى ۵۰۰۰ دوللارعا جاساعان ەكەن. ءسىز بەن ءبىز بىلەتىن NBC Sports، TeenNick، Nickelodeon، IFC، AMC، WEtv، Sundance، BET-Jazz، CBS College Sports Network، NCAA جانە ESPN۲ سياقتى الپاۋىت مەدياكومپانيادارلىڭ انونسىندا وسى زلاتكانىڭ قولتاڭباسى بار.

توني حارريستىڭ ءدارىسى دە ەرەكشە ەستە قالدى. ءال-جازيراداعى جۇمىسى، قاۋىپتى ايماقتان اقپارات تاراتۋ تۋرالى ايتقان فاكتىلەرى ەلەڭ ەتكىزدى.

وقۋ بارىسىندا بايقاعان دۇنيەنىڭ ءبىرى – مۇنداعى كەز كەلگەن باعدارلامانىڭ جۇرگىزۋشىنىڭ بەت-بەينەسىمەن كەڭەيە ءتۇسۋى. باسىندا ارنا جۇرگىزۋشىگە جۇمىس جاساسا، كەيىن جۇرگىزۋشىنىڭ بەت-بەينەسى ارنانى بايىتادى. باعدارلامار، ءتىپتى جاڭالىقتاردىڭ ءوزى جۇرگىزۋشىنىڭ اتىمەن اتالادى. ماسەلەن، NBC Nightly news with Lester Holt، Live with Kelly and Mark.

تانىمال شوۋ تۇسىرىلىمىنە كورەرمەن رەتىندە قاتىستىق

وقۋ ۋاقىتىنان تىس Live with Kelly and Mark، The View سياقتى شوۋلاردىڭ ءتۇسىرىلىم بارىسىنا كورەرمەن رەتىندە قاتىستىق. ىشكى جۇمىس پروتسەسى قىزىق، ارينە. ءبىزدى تەك تاماشالاپ قايتۋدىڭ ءوزى ەرىكسىز تاڭ قالدىردى. شوۋعا جاي كورەرمەن رەتىندە قاتىسۋ ءۇشىن كەمىندە ەكى اپتا بۇرىن تىركەلەسىز. دالادا ۇزىن-سونار كەزەك. ستۋديادا بوس ورىن جوق. كورەرمەننىڭ كوڭىلىن تاباتىن ارنايى مامان بار. كۇلدىرەدى، ينتەراكتيۆ جۇرگىزەدى. كەم دەگەندە ۱۰۰-۱۵۰ ادام ەشكىم كۇشتەمەي-اق (تەگىن) كورەرمەن رەتىندە باعدارلاماعا قاتىسادى. كەزەكتە دە ءبارى تالاسپاي، شارشاماي تەڭ تۇرادى.

جاساندى ينتەلەكتكە قارسى strike-تى دا كوردىم. سول تۋرالى بەينە ماتەريال دايىندادىم. تاڭ قالدىم دا. نارازىلىق ءبىلدىرىپ، ورتالىققا شىققانداردى سىرتتان ارنايى كۇش كەلىپ، باسىپ جانشىمادى. ءبارى مادەني تۇردە ۇيىمداسقان. وي-پىكىرلەرى ايتىلدى، ەستىلدى. نارازىلىق بىلدىرۋشىلەرگە بار جاعداي جاسالىپتى. ۇساق-تۇيەك بولۋى مۇمكىن، بىراق كوفە، تىسكە باسار، پلاكات، مەرچ، ت.ب دايىندىقتارى كوزگە ءتۇستى. اركىمنىڭ ءوز ويىن ايتۋعا قۇقى بار. ايتىلۋ دا كەرەك دەگەندى كوزبەن كوردىك. بگل جي ماسەلەسى ءالى دە وتكىر. ءتۇرلى پىكىر بار. وڭ شەشىمىن تابادى دەگەن ۇمىتتەمىن.

وسىلايشا، ۹۵٪ پايىز پراكتيكادان تۇرعان اكادەميالىق ساعاتتار ءارى-بەرى جۇگىرتتى، شيراتتى، سانانى دا ساۋلەلەندىردى. تەوريادا العان ءبىلىم مەن تاجىريبەنى بىردەن قولدانباسام دا، ىڭعايىنا قاراي ءار داعدىنى ءوز ۋاقىتىندا كادەگە جاراتارمىن دەپ ۇمىتتەنەمىن. مۇنىڭ ءبارى بەكەر ەمەس شىعار، ءسىرا.

توني حارريستىڭ دارىسىنەن تۇيگەنىم:

قانداي دا ءبىر ءىستىڭ قايىرى بار. ادامنان ارەكەت، اللادان بەرەكەت. كەز كەلگەن جۇمىستى ىنتا-شىنتامەن، قۇلشىنىسپەن، ەسەپسىز ىستەۋ كەرەك، سوندا ول جەمىستى بولادى. جۋرناليست يا جۇرگىزۋشىگە تەك ستۋديادا وتىرىپ حابار تاراتۋ مىندەت ەمەس. قاي جەردە ەمەس، قانداي اقپارات ايتقانىڭ ماڭىزدى. CNN-ءنىڭ تۋرا وقيعا ورنىنان ستۋديا جاساپ، اقپارات تاراتاتىنى بار.

ايتا كەتۋ كەرەك، وسى ءبىر تاجىريبەنى ۇلتتىق ارنا باتىس قازاقستانداعى سۋ تاسقىنى كەزىندە جۇزەگە اسىردى.

ۇزدىكسىز ءبىلىم الۋ كەرەك. كورەرمەننىڭ ساناسىن ساۋلەلەندىرۋ ءۇشىن جۇرگىزۋشى دە ءبىلىمىن جەتىلدىرىپ، جاڭالاپ وتىرۋى شارت.

وسى ورايدا ايتا كەتەيىن، قانشالىقتى ورىنسىزداۋ بولسا دا، گرۋپپالاسىمىزدىڭ ءبىرى توني حارريسكە “جۇمىستان باسقا نە ىستەيسىز؟ توي، كەش جۇرگىزەسىز بە؟” دەگەن سۇراق قويدى. “ونىڭ ەش قاجەتى جوق. بار نازار، فوكۋس جۇمىستا جانە ونىڭ ساپاسىندا”، – دەدى حارريس.

بەتەگەدەن بيىك، جۋساننان الاسا ۇستازدار

وقۋ بارىسىندا “ەممي” سىيلىعىن العان تەلەپروديۋسسەر، امەريكانىڭ جەرگىلىكتى جانە ۇلتتىق ارنالارىندا (NBC، ABC) ۇزاق ۋاقىت قىزمەت ەتكەن Robert Ferraro ساباق بەردى. جاڭالىق جاساۋدى جانە ءماتىن جازۋ مەن رەداكتسيالاۋدى ۇيرەتتى. وي دەگەن انا تىلدە سايراپ تۇر، العاشىندا اعىلشىنشا ءماتىن جازۋ وڭاي بولمادى. قانشا قينالساق تا، قاسىنان قالماي، بەرگەن ءبىلىمىن سىڭىرۋگە تىرىستىق. ول دا ۇيرەتۋدەن جالىقپادى.

تەلەپروديۋسسەر، ستسەناريست، رەجيسسەر Bill Einreinhofer ۇستاز دا ءدارىس بەردى. ءبىز جاساعان بارلىق دەرەكتى فيلمگە ءوز باعاسىن بەردى. امەريكا تەلەۆيزياسىنىڭ تاريحىمەن تانىستىرعان دا وسى پروفەسسور ەدى.

جالپى، شەتەلدە وقۋدىڭ ءبىر ارتىقشىلىعى دا وسى شىعار، ۇستاز سەنى سىنامايدى. كەز كەلگەن پىكىردى ءبىرىنشى سەنىڭ ارتىقشىلىعىڭنان باستاپ، ءسوز سوڭىن BUT (Bill Einreinhofer ءتاسىلى) “مىنانى-مىنانى قوسساڭ، ەسكەرسەڭ، بۇدان دا كۇشتى فيلم جاساي الاسىڭ”، – دەپ ءتامامدايدى. وسىلايشا، ايتىلعان سىن دا جاقسى سىڭەدى. “ويىم قاتە بولادى-اۋ، ارتىق سويلەمەيىن-اۋ” دەگەن قورقىنىش بولمايدى. سوندىقتان ىركىلمەي ايتۋ كەرەك. وسى ويىڭنىڭ بار بولعانى ءۇشىن دە قۇندىسىڭ. ءبىلىم ىزدەپ كەلدىڭ بە، سۇراۋعا قۇقىلىسىڭ. قايتا وسىنى سۇراعانىڭ قايتا جاقسى. ەشكىم ارتىق نە كەم ەمەس، ءبارى بىردەي. ونداعى تۇسىنىك وسىنداي.

ستۋدەنتتەن قىمبات تەحنيكانى ايامايدى

تاعى ءبىر ارتىقشىلىعى – پراكتيكانىڭ كوپ بولۋى. NYFA-دا قۇنى مىڭداعان دوللارلىق ءبىلىم الۋعا قاجەتتى قۇرال-جابدىق قولىڭا بەرىلەدى. ستۋدەنت ءبارىن ءوز قولىمەن ۇستاپ، ءوزى ءتۇسىرىپ، قۇراپ، جيناپ كورۋى شارت. قولدانباسا، كوزبەن كورمەسە، قالاي ۇيرەنەدى؟ وندا “قىمبات تەحنيكانى ولار قالاي قورىقپاي بەرەدى؟” دەگەن سۇراق تا تۋىندايدى. بىراق ءبارى ساقتاندىرىلعان. فورس-ماجور شارتتا جازىلادى، ەسكەرىلەدى. وسىلايشا، ستۋدەنت ەمىن-ەركىن شىعارماشىلىقپەن اينالىسادى. كەيدە قاتەلەسەسىڭ، قاتەلەسۋ ارقىلى، ءوز قاتەڭدى ءوزىڭ ءتۇسىنۋ ارقىلى وي تۇيەسىڭ. ءوز ماتەريالىڭا ءوزىڭ جاۋاپكەرشىلىك الاسىڭ. “ۆيدەونى وپەراتور تۇسىرمەپتى” دەگەن ءسوز جۇرمەيدى. ويتكەنى وپەراتور دا ءوزىڭ. مۇنداعى وقۋ ءبىر جاعى كىنانى اركىمنەن ىزدەمەي، وزىڭمەن عانا الىسۋدى ۇيرەتتى.

جۇكتى كەلىنشەككە زىلدەي كامەرانى كوتەرۋ وڭاي بولمادى

حالىقارالىق “بولاشاق” باعدارلاماسىنىڭ شەتەلدە كاسىبي بىلىكتىلىكتى ارتتىرۋعا ارنالعان تاعىلىمداماسىنىڭ وقۋ ۇزاقتىعى – ۱۰ اي. باستاپقى كەزدە كوكەيدە “ۆيدەونى ءوزىم تۇسىرسەم، وپەراتور نە ىستەيدى؟ مونتاجدى دا ءوزىم جاساسام، مەن ءۇشىن قانشاما ادام جۇمىستان شىعا ما؟” دەگەن سۇراقتاردىڭ بولعانىن نەسىنە جاسىرايىن. ەكىنشىدەن، شىنىمەن دە مي قاتتى قارسىلاستى. بۇل جەرگە دەيىن بۇرىن اۋديونى ءوز بەتىمشە تازالاپ تا كورمەگەن ەدىم. سالماعى كەم دەگەندە ۲۰ كەلىلىك كامەرانى نازىك جاندىلىعىڭا قاراماستان قولىڭا ۇستاتقاندا جىلاۋعا شاق قالادى ەكەنسىڭ. زىلدەي كامەرانى كوتەرۋ جۇكتى كەلىنشەككە ءتىپتى وڭاي بولمادى. دەسە دە، شۇكىرشىلىگىمدى ايتىپ، بار ىنتاممەن وقىدىم. “بۇل قانشاما ادامنىڭ ارمانى عوي. كەسىرلەنبە، شۇكىر دە” دەپ ءوزىمدى قامشىلادىم. جاراتۋشى دا جاردەمدەستى، كۇش بەردى. ءبىراز ۋاقىتتان كەيىن سول ساتتەن ءلاززات الىپ، كامەرانىڭ اۋىرلىعىن دا سەزبەي، قۋانا وقىدىم. قازىر ەسكە تۇسىرسەڭ، سونىڭ ءبارى كورگەن ءتۇس سياقتى وتە شىقتى. باعا جەتپەس تاجىريبە جينادىق. قولعا كۇرەكتەي ديپلومدى العاندا كوزگە ەرىكسىز جاس تۇندى. “ەڭبەك ءبارىن جەڭبەك” دەگەندەي، تابان ەت، ماڭداي تەرىمىز ەش كەتپەدى.

ازىرگە دەكرەتتىك دەمالىستامىن. بۇيىرعان كۇنى جۇمىسىما قايتا كىرىسەمىن. قازىر ۋاقىتتى ءتيىمدى پايدالانۋعا تىرىسىپ ءجۇرمىن. اعىلشىن ءتىلىن سول ورتادا جەتىلدىرىپ، الدا امەريكالىق ارىپتەستەرمەن ىسكەرلىك بايلانىس ورناتسام دەگەن نيەتىم بار. ءبىر ورىندا تۇرىپ قالماي، وي تۇكپىرىندەگى جوبا-جوسپاردى الەمدىك تاجىريبەدە ىسكە اسىرۋعا دامەلىمىن. ۇشقىر قيال، جۇيرىك وي ونىڭ بارىنە جەتىپ-اق تۇر، دەگەنمەن وعان قولىمىزدىڭ قانشالىقتى جەتەتىنىن ۋاقىت كورسەتەر.

اراي كاناپياەۆا،

جۋرناليست، New York Film Academy تۇلەگى

Тарату:

“New York Fashion Week-۲۰۲۴” حالىقارالىق ءسان كورسەتىلىمىندە قازاقستاننىڭ ءانۇرانى شىرقالدى

Тарату:

نيۋ-يورك قالاسىنداعى “Leman Ballroom” زالىندا “New York Fashion Week-۲۰۲۴” حالىقارالىق ءسان كورسەتىلىمىنىڭ ۱۶-ماۋسىمى اشىلۋىندا قازاقستاندىق ديزاينەردىڭ ۇلتتىق ءسان ۇلگىلەرى ۇسىنىلىپ، قازاق ءانشىسى ونەر كورسەتتى، دەپ حابارلايدى KazUnite ءتىلشىسى.

​بۇل ءىس-شاراعا تانىمال ديزاينەرلەر مەن ءسان الەمىنىڭ وكىلدەرى قاتىستى. سونىمەن قاتار اقش-تا تۇرىپ جاتقان قازاق ديزاينەرى، كاسىپكەر انەليا ءالىم ءوز شىعارىلىمىن نيۋ-يوركتىڭ سانقوي تۇرعىندارىنا ۇسىندى.

“NYFW-۲۰۲۴” ءسان كورسەتىلىمىندە ۇيىمداستىرۋشىلاردىڭ ارنايى شاقىرتۋىمەن نيۋ-يوركتە تۇراتىن قازاقتىڭ كاسىبي ەسترادا-دجاز ءانشىسى گۇلزار عابدراحمان قازاقستان رەسپۋبليكاسىنىڭ ءانۇرانىن ورىنداپ، “New York، New York” ءانىن شىرقادى.

“الەمگە ايگىلى ونەر جۇلدىزى فرەنك سيناترانىڭ رەپەرتۋارىنداعى “New York، New York” ءانىن العاش رەت نيۋ-يوركتە وتكەن “West Park International Music Festival-۲۰۲۲” حالىقارالىق بايقاۋىندا ورىنداعان بولاتىنمىن. “NYFW-۲۰۲۴” ءسان كورسەتىلىمىنىڭ ۇيىمداستىرۋشىلارى مەيماندارعا وسى ءاندى تارتۋ ەتۋىمدى جانە ەلىمىزدىڭ ءانۇرانىن ورىنداۋىمدى سۇراپ، ارنايى شاقىرتۋ جىبەردى. ازۋىن ايعا بىلەگەن اقش-تا، نيۋ-يورك قالاسىنىڭ تورىندە قازاقتىڭ ءانىن شىرقاۋ جانە مادەنيەتىن كورسەتۋ – مەن ءۇشىن ۇلكەن مارتەبە”، – دەدى گۇلزار عابدراحمان KazUnite تىلشىسىنە.

بۇعان دەيىن اقش-تىڭ ايگىلى كونتسەرتتىك زالدارىنىڭ ءبىرى “Carnegie Hall”-دا وتكەن “Viva music Carnegie Hall” اتتى حالىقارالىق ونەر دوداسىندا قازاقستاننىڭ اتىنان قاتىسقان گۇلزار عابدراحمان ۱-ورىندى يەلەنگەنىن جاريالاعان بولاتىنبىز.

سونداي-اق ول ۲۰۲۲ جىلدىڭ قاراشا ايىندا نيۋ-يورك قالاسىندا وتكەن “West Park International Music Festival” ءان بايقاۋىندا ۲۰ امەريكالىق ونەر مايتالمانى اراسىنان توپ جارىپ، گران-گري يەگەرى اتانعان بولاتىن. سونىمەن قاتار لوندوندا وتكەن حالىقارالىق “البيون جۇلدىزدارى-۲۰۱۹” ونەر بايقاۋىنىڭ جەڭىمپازى اتانعان.

ايتا كەتسەك، گۇلزار عابدراحمان – قازاق ۇلتتىق ونەر ۋنيۆەرسيتەتىنىڭ تۇلەگى، ماسكەۋ مەملەكەتتىك مادەنيەت ينستيتۋتىنىڭ ونەر ماگيسترى، “گۇلزار عابدراحمان ەسترادا مەكتەبىنىڭ” نەگىزىن قالاۋشىسى.

Тарату:

قىلمىس الەمىنىڭ سەركەسى – “وكىل اكە”

Тарату:

نيۋ-يورك. KazUnite – “ەڭ ۇزدىك ۱۰۰ دەتەكتيۆتىك روماندار” تىزىمىنە ەنگەن امەريكالىق جازۋشى ماريو پيۋزونىڭ “وكىل اكە” رومانىنا شولۋدى وقىرمان نازارىنا ۇسىنامىز.

ومىردە نە السىزدەردىڭ، نە مىقتىلاردىڭ قاتارىندا بولاسىڭ. باسقا تاڭداۋ جوق. ادام انادان تۋعاندا اقىلدى جانە باتىل بولىپ تۋمايدى. ونى سونداي ەتىپ ءومىر قالىپتاستىرادى.

امەريكالىق جازۋشى ماريو پيۋزونىڭ “وكىل اكە” رومانى – “ەڭ ۇزدىك ۱۰۰ دەتەكتيۆتىك روماندار” تىزىمىنە ەنگەن شىعارما.

دون ۆيتو كارلەونە – اقىل-ويى تەرەڭ، رۋحى مىقتى، باتىل ادام. ونىمەن دوس بولعانداردىڭ بارلىق ماسەلەلەرى شەشىلەدى. ال جاۋلاسقانداردىڭ ەرتە مە، كەش پە، ويلاماعان جەردەن ءدام-تۇزى تاۋسىلادى. ول ەشقاشان بوس ۋادە بەرگەن ەمەس. ال بەرگەن ۋادەسى اسپان اينالىپ جەرگە تۇسسە دە ورىندالادى.

وكىل بالاسى دجونني فونتەينگە فيلمدەگى باستى ءرولدى بەرمەگەن پروديۋسەر دجەك ۆولتسكە باس تارتا المايتىن قانداي ۇسىنىس جاساعانىن بىلەسىز بە؟ باعاسى ۶۰۰ ۰۰۰ دوللار تۇراتىن، جانىنا بالاعان بايگە اتىنىڭ باسىن كەسىپ، توسەگىنە تاستاعان. بۇل ارەكەت وركوكىرەك پروديۋسەردى بىردەن تاۋبەسىنە تۇسىرگەنى ءسوزسىز.

وسىنداي ىقپالدى ادامنىڭ سابىرلى مىنەزىنە قايران قالاسىڭ جانە كەلىسسوز جۇرگىزۋدىڭ حاس شەبەرى ەكەنىن ەركسىز مويىندايسىڭ. “ەش ۋاقىتتا اشۋلانبا، ەشقاشان سويلەسىپ وتىرعان ادامىڭدى قورقىتپا، ويىن ەركىن جانە ساليقالى ايتىپ جەتكىزۋىنە مۇمكىندىك بەر”. بۇل – دون كارلەونەنىڭ باستى ۇستانىمى.

ول كوزىنىڭ تىرىسىندە كارلەونە اۋلەتىنىڭ باسشىلىعىن ءۇشىنشى ۇلى مايكلگە بەرەدى. اياۋشىلىقتى بىلمەيتىن، قاتىگەز باسكەسەرلەر الەمىندە ءوز بيلىگىڭدى جۇرگىزۋ ءۇشىن سەن قاسقىرداي ايبارلى، جولبارىستاي جۇرەكتى بولۋىڭ كەرەك. سەنىڭ بويىڭنان ءسال السىزدىك پەن وزىڭە دەگەن سەنىمسىزدىكتى اڭعاراتىن بولسا، ماڭايىڭداعىلار ءتۇتىپ جەۋگە ءازىر تۇرادى.

دون مايكل كارلەونە – ازۋى التى قارىس ناعىز كوكجالدىڭ ءوزى. تاۋەكەلگە بارۋدان قورىقپايتىن، جاۋاپكەرشىلىكتى ءوز موينىنا الۋدان قاشپايتىن، نامىستى ازامات. ەندى نيۋ-يوركتەگى كريمينالدىق كلاندار ونىمەن ساناساتىن بولادى. كەك – سالقىن كۇيىندە ۇسىنىلاتىن تاعام ءتارىزدى. ۋاقىتى كەلگەندە بۇنىڭ يەلىگىنە قول سالعاندار ءوز جازاسىن الۋى ءتيىس.

“باتىر ءبىر وقتىق” دەگەن زاماندا قانداي جاۋجۇرەك بولساڭ دا، قويدىڭ قۇمالاعىنداي قورعاسىنعا قارسى ەشتەڭە ىستەي المايسىڭ. سوندىقتان ناعىز كوشباسشىعا سۇڭعىلا اقىل مەن بولاشاعىڭدى بولجاي بىلەتىن زەرەكتىك وتە قاجەت.

شىعارماعا ارقاۋ بولعان ادام تاعدىرلارى مەن شىم-شىتىرىق وقيعالار وقىرماندى بىردەن ەلىتىپ اكەتەدى. تۋىندىنىڭ جەلىسى بويىنشا تۇسىرىلگەن “وكىل اكە” ءفيلمى ۱۹۷۲ جىلى كينەموتوگرافيا تاريحىنداعى ەڭ كاسسالى فيلم رەتىندە تىركەلگەن. اتالعان فيلم ۱۹۹۰ جىلى مادەنيەت يگىلىگى دەپ تانىلىپ، اقش ۇلتتىق فيلمدەر رەەسترىنە ەنگىزىلگەن.

الەم بويىنشا كوپشىلىك وقىرماننىڭ ىستىق ىقىلاسىنا بولەنگەن جازۋشى ماريو پيۋزونىڭ “وكىل اكە” رومانى “فوليانت” باسپاسىنان قازاق تىلىندە جارىق كوردى.

وسى جانە باسقا دا كىتاپتاردى foliantbooks.com سايتى ارقىلى تاپسىرىس بەرۋگە بولادى.

Тарату:

ۇرسۇلتان نازارباەۆ پارلامەنت ءماجىلىسى مەن ءماسليحاتتار دەپۋتاتتارىن سايلاۋ راسىمىنە قاتىستى

Тарату:

استانا. KazUnite – نۇرسۇلتان نازارباەۆ “استانا وپەرا” مەملەكەتتىك وپەرا جانە بالەت تەاترى عيماراتىندا قازاقستان رەسپۋبليكاسىنىڭ پارلامەنت ءماجىلىسى مەن ءماسليحاتتار سايلاۋىندا داۋىس بەردى.

داۋىس بەرۋ راسىمىنەن كەيىن قازاقستاننىڭ تۇڭعىش پرەزيدەنتى بارشا قازاقستاندىقتاردى كەلە جاتقان ءاز-ناۋرىز مەرەكەسىمەن قۇتتىقتادى.

دەرەككوز: nazarbaev.kz

Тарату:

سەمەيدە ۳۲ كوپپاتەرلى ءۇيدىڭ قاسبەتى جوندەلەدى

Тарату:

سەمەي. KazUnite – سەمەيدە ۳۲ كوپپاتەرلى ءۇيدىڭ قاسبەتى جوندەلەدى. بۇل تۋرالى سەمەي قالاسىنىڭ اكىمى نۇربول نۇرساعاتوۆ قالا تۇرعىندارىمەن وتكەن كەزدەسۋىندە مالىمدەدى.

“بيىل قالا اكىمدىگى قالانىڭ سىرتقى كەلبەتىنە ەرەكشە كوڭىل بولەدى. ۲۰۲۳ جىلى قالانىڭ سىرتقى كەلبەتىن جاقسارتۋ ءۇشىن تۇرعىن ءۇي شارۋاشىلىعىن دامىتۋ جونىندەگى جۇمىستار شەڭبەرىندە ۳۲ كوپقاباتتى تۇرعىن ءۇيدىڭ قاسبەتتەرىنە اعىمداعى جوندەۋ جۇمىستارى جۇرگىزىلەتىن بولادى”، – دەدى نۇربول نۇرساعاتوۆ.

سونداي-اق بيىل بىرنەشە كوپقاباتتى تۇرعىن ۇيلەردىڭ قابىرعالارىنا مۋرالدار بەينەلەنبەك.

“تۇرعىن ۇيلەردىڭ سىرتىنا سەمەي قالاسىنىڭ تۋريستىك كەلبەتىن بەينەلەيتىن جانە قالاعا ەرەكشە كورىك بەرەتىن مۋرالداردى سالۋدى جوسپارلاپ وتىرمىز. مىسالى، ش.قۇدايبەردىۇلى، ب.مومىشۇلى، ق.ساتباەۆ كوشەلەرىندەگى ۇيلەرگە سول ۇلى تۇلعالاردىڭ بەينەلەرى بار مۋرالدار سالىنادى. سونىمەن قاتار، ؀۱ شاعىن اۋدانداعى بىرنەشە ءۇيدىڭ قابىرعالارىنا اباي وبلىسىنىڭ كورىكتى جەرلەرىنىڭ سۋرەتتەرى بەينەلەنەدى”، -دەدى قالا اكىمى.

Тарату:

قر پرەزيەنتى اقش مەملەكەتتىك حاتشىسى ەنتوني بلينكەندى قابىلدادى

Тарату:

استانا. KazUnite – قازاقستان پرەزيدەنتى قاسىم-جومارت توقاەۆ استاناعا رەسمي ساپارمەن كەلگەن اقش-تىڭ مەملەكەتتىك حاتشىسى ەنتوني بلينكەندى قابىلدادى. بۇل تۋرالى اقوردا جاريالادى.

مەملەكەت باسشىسى امەريكالىق ديپلوماتقا ءىلتيپات بىلدىرە وتىرىپ، قازاقستان مەن اقش اراسىندا ديپلوماتيالىق بايلانىس ورناعان ۋاقىتتان بەرى ەكىجاقتى جانە كوپجاقتى فورماتتا ءوزارا ءتيىمدى ءىس-ارەكەتتەر جولعا قويىلعانىن اتاپ ءوتتى.

“ءسىزدىڭ ساپارىڭىز ستراتەگيالىق ىنتىماقتاستىقتى نىعايتۋعا تىڭ سەرپىن بەرۋ تۇرعىسىنان وتە ماڭىزدى. قاۋىپسىزدىك، ەنەرگەتيكا، ساۋدا جانە ينۆەستيتسيا سەكىلدى ماڭىزدى ستراتەگيالىق سالالارداعى سەنىمدى ءارى ۇزاقمەرزىمدى سەرىكتەستىك قاتىناستارىمىز وتە جاقسى. سوندىقتان ءبىز بۇل ىنتىماقتاستىقتى ودان ءارى دامىتۋعا دايىنبىز. وسى مۇمكىندىكتى پايدالانا وتىرىپ، قۇراما شتاتتاردىڭ تاۋەلسىزدىگىمىزدى، اۋماقتىق تۇتاستىعىمىز بەن ەگەمەندىگىمىزدى تۇراقتى تۇردە بەرىك قولداپ كەلە جاتقانى ءۇشىن ريزاشىلىعىمدى بىلدىرگىم كەلەدى”، – دەدى پرەزيدەنت.

مەملەكەت باسشىسى ەكونوميكالىق ىنتىماقتاستىق جونىندە ايتا كەلە، اقش قازاقستاننىڭ ۶۲ ميلليارد دوللاردان استام ينۆەستيتسيا قۇيعان ءىرى ينۆەستورلاردىڭ ءبىرى ەكەنىن اتاپ ءوتتى.

قاسىم-جومارت توقاەۆ ورتالىق ازيا ەلدەرى مەن اقش-تىڭ سىرتقى ساياسي ۆەدومستۆولارى جەتەكشىلەرى كەزدەسۋىنىڭ استانادا ءوتۋى ماڭىزدى ەكەنىن اتاپ ءوتىپ، قۇراما شتاتتاردىڭ س۵+۱ فورماتىنداعى ىنتىماقتاستىقتى نىعايتۋعا باعىتتالعان كۇش-جىگەرىن قۇپتادى.

ءوز كەزەگىندە اقش-تىڭ مەملەكەتتىك حاتشىسى قوناقجايلىق كورسەتكەنى ءۇشىن قاسىم-جومارت توقاەۆقا العىس ايتىپ، اقش پرەزيدەنتىنىڭ سالەمىن جەتكىزدى.

“۳۰ جىلدان استام ۋاقىت ىشىندە قول جەتكىزگەن ەلەۋلى تابىستاردى ەكىجاقتى دەڭگەيدە دامىتۋ، سەرىكتەستىگىمىزدى تەرەڭدەتۋ جانە نىعايتۋ ماڭىزدى. تەك سوڭعى جىلدارى ءبىز وسى باعىتتا ماڭىزدى ءارى جاڭا جەتىستىكتەرگە قول جەتكىزدىك. ءبىزدىڭ قارىم-قاتىناستارىمىز بەرىك جانە بايلانىستارىمىز كۇشەيە تۇسەدى. ءبىز وسى باعىتتان اينىمايمىز. سونىمەن قاتار بۇگىن استانادا ورتالىق ازياداعى سەرىكتەستەردىڭ باسىن قوسقانىڭىز ءۇشىن سىزگە جانە ءسىزدىڭ ۇجىمىڭىزعا العىس ايتامىز. ارىپتەستەرىمىز – سىرتقى ىستەر مينيسترلەرىمەن بىرگە ايماقتى بىرىكتىرۋگە باعىتتالعان بەرىك ءارى تىعىز قارىم-قاتىناس جاساۋ، ناقتى ماسەلەلەرگە نازار اۋدارۋ جونىندەگى جۇمىستارعا اتسالىسامىز دەپ ۇمىتتەنەمىن. بۇل ورتالىق ازيا حالىقتارى مەن امەريكا قۇراما شتاتتارىنا پايدالى بولادى دەپ ويلايمىن. ءبىز ەڭ جوعارى دەڭگەيدە ءوزارا ءىس-ارەكەت جاساۋعا نيەتتىمىز. مەن وسىندا كەلگەنىمە جانە ىنتىماقتاستىعىمىزدى نىعايتۋعا ءوز ۇلەسىمدى قوسقانىما وتە قۋانىشتىمىن”، – دەدى ەنتوني بلينكەن.

سونىمەن قاتار امەريكا ديپلوماتى قازاقستانداعى ساياسي جانە ەكونوميكالىق وزگەرىستەرگە جوعارى باعا بەردى.

كەزدەسۋ سوڭىندا قاسىم-جومارت توقاەۆ اقش پرەزيدەنتى دجو بايدەنگە جۇرەكجاردى سالەمىن جولدادى.

Тарату:

اقش پەن قازاقستاندى نە ورتاقتاستىرادى

Фото: orda.kz
Тарату:

ۆاشينگتون. KazUnite – امەريكا قۇراما شتاتتارى ۱۹۹۱ جىلى قازاقستاننىڭ تاۋەلسىزدىگىن مويىنداعان العاشقى ەلدىڭ ءبىرى جانە سودان بەرى قاۋىپسىزدىك پەن ەكونوميكالىق دامۋداعى بەرىك سەرىكتەس بولىپ كەلەدى. بۇل تۋرالى اقش مەملەكەتتىك دەپارتامەنتىنىڭ ءباسپاسوز قىزمەتى مالىمدەدى.

“اقش ۱۹۹۲ جىلى قاڭتاردا الماتىدا ەلشىلىگىن اشتى. سودان كەيىن ەلشىلىك ۲۰۰۶ جىلى جاڭا ەلوردا استاناعا كوشتى. امەريكا قۇراما شتاتتارى ۲۰۰۹ جىلى الماتىدا باس كونسۋلدىعىن اشتى. قازاقستان تاۋەلسىزدىك العاننان بەرگى جىلداردا ەكى ەل ۲۰۱۸ جىلدان بەرى كەڭەيتىلگەن ستراتەگيالىق سەرىكتەستىك دەپ اتالاتىن بەرىك جانە كەڭ اۋقىمدى ەكىجاقتى قارىم-قاتىناستى دامىتتى”، – دەلىنگەن اقش مەملەكەتتىك دەپارتامەنتىنىڭ اقپاراتىندا.

“قازاقستان – يادرولىق قارۋدان باس تارتقان جاحاندىق كوشباسشى”

سونىمەن قاتار مەملەكەتتىك دەپارتامەنت قازاقستاننىڭ ۆاشينگتونداعى (۲۰۱۰، ۲۰۱۶)، سەۋلدەگى (۲۰۱۲) جانە گااگاداعى (۲۰۱۴) يادرولىق قاۋىپسىزدىك سامميتتەرىنە قاتىسۋى قازاقستاننىڭ قاۋىپسىزدىك جانە يادرولىق قارۋدى تاراتپاۋ سالاسىنداعى ىنتىماقتاستىعى قارىم-قاتىناستىڭ نەگىزى بولىپ سانالاتىنىن اتاپ ءوتتى. “قازاقستان يادرولىق قارۋدى تاراتپاۋ سالاسىنداعى ءوزىنىڭ جاحاندىق كوشباسشىلىعىن العاش رەت ۱۹۹۳ جىلى كەڭەس وداعىنان قالعان يادرولىق قارۋدان باس تارتىپ، سەمەي پوليگونىن جاپقاندا كورسەتتى. سودان كەيىن امەريكا قۇراما شتاتتارى قازاقستانعا يادرولىق قارۋ-جاراققا ارنالعان ماتەريالداردى جانە ولاردى قولداۋشى ينفراقۇرىلىمداردى جويۋعا كومەكتەستى. ۱۹۹۴ جىلى قازاقستان امەريكا قۇراما شتاتتارىنا جارتى توننادان اسا قارۋ-جاراق ۋرانىن بەردى. ۱۹۹۵ جىلى قازاقستان ءوزىنىڭ سوڭعى يادرولىق وقتۇمسىقتارىن الىپ تاستادى جانە اقش-تىڭ كومەگىمەن ۲۰۰۰ جىلدىڭ مامىرىندا ۱۸۱ يادرولىق سىناق تۋننەلدەرىن پلومبالاۋدى اياقتادى. كەلەسى ونجىلدىقتا امەريكا قۇراما شتاتتارى مەن قازاقستان يادرولىق سىناقتار وتكىزەتىن تاعى ۴۰ تۋننەلدى تىعىزداۋ بويىنشا بىرلەسىپ جۇمىس ىستەدى. ۲۰۲۱ جىلى امەريكا قۇراما شتاتتارى “تاجىريبە الاڭىندا” وسال بولىنەتىن ماتەريالداردى قورعاۋعا جانە يادرولىق ماتەريالداردىڭ تارالۋىنا قارسى تۇرۋعا باعىتتالعان بىرنەشە جوبالاردى اياقتادى. اقش پەن قازاقستان بىرلەسىپ، قازاقستاننىڭ ءۇش زەرتتەۋ رەاكتورىنىڭ ەكەۋىن تومەن بايىتىلعان ۋران وتىنىنا اينالدىردى جانە قازاقستاننان بارلىق ساۋلەلەنبەگەن جوعارى بايىتىلعان ۋران وتىنىن الىپ تاستادى”، – دەدى اقش مەملەكەتتىك دەپارتامەنتىنەن.

۲۰۱۷ جىلى اقش پەن قازاقستان الماتى ماڭىندا يادرولىق قاۋىپسىزدىك بويىنشا جەرگىلىكتى، ايماقتىق جانە حالىقارالىق مامانداردى وقىتۋ جانە اقپاراتتاندىرۋ ءۇشىن پايدالانىلاتىن يادرولىق قاۋىپسىزدىك بويىنشا وقۋ ورتالىعىن اشتى. قازاقستان ەۋروپاداعى قارۋلى كۇشتەر تۋرالى شارتقا (۱۹۹۲)، يادرولىق قارۋدى تاراتپاۋ تۋرالى شارتقا (۱۹۹۳)، حيميالىق قارۋ تۋرالى كونۆەنتسياعا جانە سىناقتارعا جاپپاي تىيىم سالۋ تۋرالى شارتقا (۲۰۰۱) قول قويدى. ۲۰۱۵ جىلى قازاقستان ۇكىمەتى اتوم ەنەرگياسى جونىندەگى حالىقارالىق اگەنتتىكپەن ۲۰۱۹ جىلى العاشقى جونەلتىلىمدەرىن العان تومەن بايىتىلعان ۋران بانكىن ورنالاستىرۋ تۋرالى كەلىسىم جاسادى. بىرلەسكەن قاۋىپتەردى ازايتۋ باعدارلاماسى اياسىندا اقش قازاقستانعا كومەكتەسۋ ءۇشىن ۵۰۰ ميلليون دوللاردان اسا قاراجات جۇمسادى.

ەكى ەل اراسىنداعى اسكەري بايلانىس

“قازاقستاننىڭ قاۋىپسىزدىك كۇشتەرى اقش-تىڭ “حالىقارالىق اسكەري ءبىلىم جانە وقىتۋ باعدارلاماسى”، “شەتەلدىك اسكەري قارجىلاندىرۋ باعدارلاماسى”، “شەتەلدەگى گۋمانيتارلىق اپاتتار جانە ازاماتتىق كومەك” باعدارلاماسى، ۋەلس باستاما قورى، جاحاندىق بەيبىتشىلىك وپەراتسيالارى باستاماسى جانە سەرىكتەستىك الەۋەتىن ارتتىرۋ باعدارلاماسىنان قاراجات الادى. قازاقستان اسكەريلەرى اقش قارجىلاندىراتىن “دالا قىرانى”، “ۆيكينگ”، “ەيگەر ارىستان” جانە “شانتي پراياس” سياقتى اسكەري جاتتىعۋلارعا قاتىسادى”، – دەلىنگەن اقپاراتتا.

ەكىجاقتى ەكونوميكالىق قاتىناستار

قازاقستان امەريكا قۇراما شتاتتارىنىڭ ۸۱-ءشى ءىرى ساۋدا سەرىكتەسى بولىپ سانالادى. ۲۰۲۱ جىلى ەكى جاقتى ساۋدانىڭ جالپى سوماسى ۲،۵ ميلليارد دوللاردى قۇراعان. اقش فيرمالارى مۇناي-گاز سەكتورىندا شوعىرلانعان قازاقستانعا ونداعان ميلليارد دوللار ينۆەستيتسيا قۇيعان. ۱۹۹۴ جانە ۱۹۹۶ جىلداردان بەرى اقش پەن قازاقستان اراسىنداعى ەكىجاقتى ينۆەستيتسيالىق كەلىسىم جانە قوسارلى سالىق سالۋدى بولدىرماۋ تۋرالى شارت جۇمىس ىستەپ كەلەدى. قازاقستان دۇنيەجۇزىلىك ساۋدا ۇيىمىنا ۲۰۱۵ جىلدىڭ ۳۰ قاراشاسىندا مۇشە بولعان.

“امەريكا قۇراما شتاتتارىنىڭ ۱۹۷۴ جىلعى ساۋدا تۋرالى زاڭىنىڭ ۴۰۲ جانە ۴۰۹-تاراۋلارى پرەزيدەنتتىڭ كونگرەسكە جارتى جىلدا ءبىر رەت ساۋدا زاڭىنىڭ دجەكسون-ۆەنيك تۇزەتۋىنە سايكەس كەلەتىن ەلدەردىڭ، سونىڭ ىشىندە قازاقستاننىڭ ەميگراتسيا ەركىندىگى تۋرالى زاڭنىڭ ەرەجەلەرىن ساقتاۋدى جالعاستىرۋى تۋرالى ەسەپ بەرۋىن تالاپ ەتەدى. اقش كوممەرتسيالىق قىزمەتى كەڭەس بەرۋ، نارىقتى زەرتتەۋ جانە قازاقستاندىق بيزنەسپەن سايكەستىك باعدارلاماسى ارقىلى قازاقستاندىق نارىققا شىعۋعا تىرىساتىن امەريكالىق بيزنەسكە قولداۋ كورسەتەدى”، – دەدى اقش مەملەكەتتىك دەپارتامەنتىنەن.

قازاقستاننىڭ حالىقارالىق ۇيىمدارعا مۇشەلىگى

قازاقستان مەن اقش تا كوپتەگەن حالىقارالىق ۇيىمدار ارقىلى ءوزارا ارەكەتتەسەدى. قازاقستان – بىرىككەن ۇلتتار ۇيىمىنىڭ، ەۋروپاداعى قاۋىپسىزدىك جانە ىنتىماقتاستىق ۇيىمىنىڭ (ەقىۇ) جانە ەۋرواتلانتيكالىق ارىپتەستىك كەڭەسىنىڭ مۇشەسى. قازاقستان ۲۰۱۷-۲۰۱۸ جىلدارى بۇۇ قاۋىپسىزدىك كەڭەسىنىڭ تۇراقتى ەمەس مۇشەسى اتانىپ، ۲۰۱۰ جىلى ەقىۇ-عا توراعالىق ەتتى. سونىمەن قاتار سولتۇستىك اتلانتيكالىق شارت ۇيىمىنىڭ (ناتو) “بەيبىتشىلىك ءۇشىن ارىپتەستىك” باعدارلاماسىنىڭ بەلسەندى قاتىسۋشىسى بولىپ سانالادى. قازاقستان ازياداعى ءوزارا ءىس-قيمىل جانە سەنىم شارالارى كەڭەسىن قۇردى. قازاقستان – سونداي-اق ۇجىمدىق قاۋىپسىزدىك شارتى ۇيىمىنا (ۇقشۇ) جانە شانحاي ىنتىماقتاستىق ۇيىمىنا (شىۇ) مۇشە.

Тарату:

بەلباساردىڭ مايتالمان شوپانى

Тарату:

جامبىل وبلىسى. KazUnite – قازاق قوعامىندا اقساقالدار ينستيتۋتىنىڭ ورنى ەرەكشە. حالقىمىز قارتتاردى اقىل دارياسى، دانالىق قازىناسى رەتىندە قادىرلەگەن. قاريالاردىڭ قاتىسۋىنسىز قوعامدا قوردالانعان ماسەلەلەر شەشىلىپ، قارىمدى ىستەر قولعا الىنباعان. قارتىن قادىرلەپ، قارا شاڭىراقتىڭ قۇتى مەن كيەسى دەپ ۇققان حالقىمىز ولارعا قاشاندا توردەن ورىن بەرگەن. سونداي اقساقالدىڭ ءبىرى – جامبىل وبلىسى شۋ اۋدانى بەلباسار اۋىلىنىڭ تۇرعىنى ءازىز تۇرىسبەك.

ءازىز ابدراقمانۇلى ۱۹۴۸ جىلى ۲ قازان كۇنى قىتايدىڭ شولاقتەرەك ەلدىمەكەنىندە دۇنيەگە كەلگەن. بالا كۇنىنەن اتاسىنىڭ ءتالىمىن الىپ، باۋىرىندا وسكەن. اتاسى تۇرىسبەك اقساقال ەلگە ءمالىم يمام-مولدا بولعان. بالالاردىڭ ساۋاتىن اشىپ، حات تانىتقان ەكەن. تۇرىسبەك اقساقالدىڭ قاتىسۋىمەن الباننىڭ ىشىندەگى قۇرمان رۋىنان شىققان ازاماتتار بىرلەسىپ، سول كەزدەرى قىتايدا مەشىت سالدىرىپتى. سول مەشىتتىڭ ورنى ءالى كۇنگە دەيىن بار دەسەدى.

ءازىز ابدراقمانۇلىنىڭ بالالىق شاعى قىتايدا وتكەن. ەسكىشە، ياعني قازاقتىڭ توتە جازۋ عارپىمەن حات تانىعان. ۱۹۶۲ جىلى ۇلى كوشپەن بىرگە اتاجۇرتى قازاقستانعا ورالىپ، قازىرگى تۇركىستان وبلىسى سوزاق اۋدانى قۇمكەنت سوۆحوزىنا قونىستانعان. سول اۋىلدا ورتا ءبىلىم الىپ، ۱۹۶۸-۱۹۷۰ جىلدارى ۋكراينانىڭ حاركوۆ قالاسىندا اسكەري بورىشىن وتەپ كەلگەن.

۱۹۷۱ جىلى تامىلجىعان تامىزدىڭ ۷ جۇلدىزىندا ءازىز ابدراقمانۇلى مەن كۇلاز باعاشارقىزى وتاۋ تىگىپ، شاڭىراق كوتەرگەن. شىمكەنتتە تۇڭعىش قىزدارى ورىنكۇل دۇنيەگە كەلدى. ءسابي سىڭعىرى قۋانىش سىيلاپ، ءتۇتىنى ءتۇزۋ ۇشقان وتباسىنىڭ كۇندەرى وسىلاي ءوتىپ جاتادى.

بىردە شۋ اۋدانىنداعى اعايىن-جۇراعاتى ءازىز ابدراقمانۇلىنا كەلىپ، كەڭەس قۇرىپ: “ءوزىمىز ءبىر ماڭايعا شوعىرلانىپ، توسكەيدە مالىمىز قوسىلىپ، بەرەكەلى كۇن كەشەيىك” دەگەن ۇسىنىستارىن ايتىپ، جامبىل وبلىسىنا شاقىرادى. سودان ۇلكەندەردىڭ ءسوزىن جەرگە تاستاماي، ءازىز ابدراقمانۇلى ۱۹۷۳ جىلى وتباسىمەن بىرگە جامبىل وبلىسى شۋ اۋدانى بەلباسار اۋىلىنا قوناستانادى. سول جىلى ەكىنشى بالاسى دۇنيەگە كەلدى. جامبىل وڭىرىنە ءارى جامبىلساي قىستاعىنا كەلگەندە ومىرگە كەلگەندىكتەن، ۇلدارىنىڭ اتىن جامبىل دەپ قويادى.

اعايىن-تۋىستىڭ ورتاسىنا ورنىعىپ، جاقسى-جايساڭ جۇرتپەن قاۋىشقان ءازىز ابدراقمانۇلى اتا كاسىپ مال شارۋاشىلىعىمەن اينالىسۋدى قولعا الادى. ءبىر وتار قوي الىپ، جەكە باعادى. وسىلايشا، قايناعان تىرشىلىك، شوپاندىق ءومىر باستالادى. سودان تەرىسكەيدە ءبىر جىل قىستاپ، جامبىلساي، ۇڭگىرلى، جىلىساي قىستاۋلارىندا كوشىپ-قونىپ جۇرەدى. ال جاز ايلارىندا ەسپە، سۇلىكتى، سۋانقۇدىق، بيبۇعا جايلاۋلارىن مەكەندەگەن.

۱۹۷۶ جىلى ءۇشىنشى پەرزەنتى زيناگۇل ۇڭگىرلى قىستاۋىندا، ۱۹۷۸ جىلى ءتورتىنشى بالاسى ەربولات جىلىساي قىستاۋىندا، ۱۹۸۰ جىلى بەسىنشى بالاسى نۇربولات جادىرا جايلاۋىندا، ۱۹۸۲ جىلى كەنجە بالاسى ايدارحان جىلىساي قىستاۋىندا دۇنيەگە كەلدى. قازىرگى تاڭدا بالالارىنىڭ بارلىعى ءۇيلى-باراندى، ءتۇرلى سالادا ەڭبەك ەتىپ ءجۇر. ايدارحان الماتى قالاسىندا، زاڭ سالاسىندا قىزمەت اتقارادى.

بەلباساردىڭ مايتالمان شوپانى بولعان ءازىز ابدراقمانۇلى زەينەت دەمالىسىنا شىققانعا دەيىن وسى كاسىبىنەن قول ۇزبەدى. ۇزاق جىلدار ىشىندە دامىلسىز جۇمىس ىستەپ، وسى سالاعا ابدەن ەڭبەگى ءسىڭدى. مىسالى، ۱۹۹۴ جىلى انالىق باس ءار ۱۰۰ ساۋلىقتان ۱۳۰ قوزىدان العان كەزدەرى بولدى. وتارداعى ۵۰۰-۶۰۰ قويدىڭ ءجۇنىن قىرقاتىن. ءار قويدىڭ ءجۇنى ۴-۵ كەلى تارتاتىن ەدى. جۇمىستىڭ اۋىرلىعىنا قارامادى. سوعان وراي تابان ەت، ماڭداي تەرى، ەرەن ەڭبەگى ەلەۋسىز قالمادى. ماراپاتتان دا كەندە بولمادى. ۇكىمەت تاراپىنان ەڭ اۋەلى گاز-۵۲ جۇك كولىگىنە، كەيىننەن سول كەزدە باسشىلار جۇرەتىن ۋاز اۆتوكولىگىنە يە بولدى. جومارت ازاماتتار دا ەڭبەگىن باعالاپ، ات مىنگىزىپ، ەرتوقىم، كىلەم سياقتى ءتۇرلى سىي-سياپاتتارىن كورسەتىپ جاتتى. سونىمەن قاتار ۹۰-جىلدارى “تاۋراس” ماركالى ءتۇرلى-ءتۇستى تەلەديدار ۇتىپ العانى بالالارىنىڭ ەسىندە ەرەكشە ساقتالعان. سەبەبى ول كەزدە مۇنداي تەلەديدار اۋىل-ايماقتا سيرەك ەدى. ءتىپتى سول ۋاقىتتا ءتۇرلى-ءتۇستى تەلەديدارلار ەلىمىزگە ەندى-ەندى عانا كەلىپ جاتقان ەدى. سونداي-اق ءازىز ابدراقمانۇلىنا ءار جىلدارى ماداقتاما قاعازدارى، وبلىس ورتالىعىنداعى دەمالىس ورىندارىنا جولدامالار تابىستالدى. اۋىلدىڭ ابىرويلى، بەتكە ۇستار ازاماتى بولدى. بۇگىندە اۋزى دۋالى اقساقال.

“ءومىردىڭ ءبىر قىزىعى – بالا” دەمەكشى، ۴ ۇل، ۲ قىز وسىرگەن ءازىز ابدراقمانۇلى مەن كۇلاز باعاشارقىزى بالالارىنان ۳۱ نەمەرە، ۷ شوبەرە كوردى. ۵۱ جىل جۇپتارى جازىلماعان ونەگەلى وتباسى ۇرپاق قىزىعىنا كەنەلىپ، باقىتتى عۇمىر كەشتى.

تاعدىردىڭ جازعانىنا شارا بار ما؟ ۲۰۲۲ جىلدىڭ قىركۇيەك ايىندا كۇلاز باعاشارقىزى ۷۲ جاسىندا ومىردەن ءوتتى. توپىراعى تورقا، جانى ءجانناتتا بولىپ، رۋحى پەيىشتىڭ تورىندە شالقىسىن!

“ۇيىڭدە قارتىڭ بولسا، جازىپ كەتكەن حاتپەن تەڭ” دەگەندەي، مۇقاعالي جىرعا قوسقان داريا كوڭىلدى قاريالارىمىزدى قادىرلەي بىلەيىك. ءازىز ابدراقمانۇلىنا مىقتى دەنساۋلىق، ۇزاق عۇمىر تىلەيمىز! جاساي بەرىڭىز! ۇرپاعىڭىزبەن مىڭ جاساڭىز! جان-جاعىڭىز تەگىس امان بولسىن!

Тарату:

استانا ارحيتەكتۋراسىندا قولتاڭباسى بار ساڭلاق ساۋلەتشى

Тарату:

استانا. KazUnite – ۋاقىت ءىزىن ايشىقتاۋعا كەلگەندە ساۋلەت ونەرىنەن اسقان قۇدىرەتتى دۇنيە كەمدە-كەم. قارا جەرگە قازىق بولىپ قاعىلىپ، ءزاۋلىم بولىپ ىرگەسى قالاناتىن عيماراتتار قاي شاحاردىڭ دا تاريحىنان سىر شەرتىپ تۇراتىنى داۋسىز. مىسالى، استانانى ساۋلەتتى قالا اتاندىرعان ءزاۋلىم عيماراتتار مەن مونۋمەنتتەردىڭ كوبى – قازاقستاندىق ارحيتەكتورلاردىڭ قولتاڭباسى. ەلوردا ساۋلەتىنىڭ ءسان-سالتانات قۇرۋىنا ۇلەس قوسقان ارحيتەكتورلاردىڭ ءبىرى – “ۇزدىك قۇرىلىسشى”، “ۇزدىك جوبالاۋشى” مەدالدارىنىڭ يەگەرى گابدراحيم كامەنوۆ.

۲۰۱۵-۲۰۱۷ جىلدارى ەكسپو قالاشىعىن سالۋعا اتسالىسقان گابدراحيم كامەنوۆ “استانا برازەرس”، IT ENGINEERING SA-نىڭ ينجەنەرلىك جەلىلەرى سىندى ۶ نىساننىڭ قۇرىلىسىنا اۆتورلىق قاداعالاۋ جۇرگىزگەن.

۲۰۱۷ جىلدان باستاپ بۇگىنگە دەيىن “اstana-Project”، “الاتاۋ-ساۋلەت” جاۋاپكەرشىلىگى شەكتەۋلى سەرىكتەستىكتەرىندە جوبانىڭ باس ينجەنەرى جانە جوبانىڭ باس ارحيتەكتورى بولىپ قىزمەت اتقارىپ كەلەدى.

ال ۲۰۰۸-۲۰۱۷ جىلدار ارالىعىندا “استانا ترەيد ينتەرنەشنل” جاۋاپكەرشىلىگى شەكتەۋلى سەرىكتەستىگىندەگى جوبانىڭ باس ارحيتەكتورى رەتىندە “ەدەم ۲”، “وليمپ پالاس ۲” تۇرعىن ءۇي كەشەندەرى مەن جاڭا جول كوشەسىندەگى جاتاقحانا-قوناق ءۇي قۇرىلىستارى مەن جوبالارىنىڭ اۆتورى بولعانىن ايتا كەتۋ كەرەك.

قازىرگى تاڭدا ىسكە اسىرىلىپ جاتقان جوبالارىنىڭ قاتارىندا استاناداعى ۱۲۰۰ جانە ۹۰۰ ورىندىق مەكتەپتەر مەن الماتى قالاسىنداعى جىلدام اۆتوبۋس تاسىمالى جانە ۲۰۰ اۆتوبۋسقا ارنالعان دەپو قۇرىلىسى سياقتى بىرقاتار جوبالار بار.

گابدراحيم نۇرجانۇلى ۱۹۶۰ جىلى ۱۶ قاڭتاردا بۇگىنگى استانا، بۇرىنعى تسەلينوگراد قالاسىندا قازىرگى كۇلاش بايسەيىتوۆا كوشەسى، ۱۹-ۇيدە دۇنيەگە كەلگەن. ول كەزدە بۇل كوشە “ۆودوپروۆودنايا كوشەسى” دەپ اتالعان. اناسىنىڭ تولعاعى باستالعان كەزدە مينۋس ۴۰ گرادۋستىق ارقانىڭ سارىشۇناق ايازى بولعاندىقتان، تاجىريبەلى وكۋشەر ءوزى ۇيگە بارىپ بوساندىرىپتى. جارىق ومىرگە كەلگەن قىزىلشاقا ءسابي بۇكىل كوشەنى باسىنا كوتەرىپ، جىلاعان ەكەن.

فوتودا گابدراحيم كامەنوۆ اتا-اناسىمەن، اعا-اپكەلەرىمەن

گابدراحيم كامەنوۆ – ۇيدەگى ۴ ۇلدىڭ كەنجەسى. جولدىبەك، جاقسىلىق، عالىم ەسىمدى اعالارىنان كەيىن گابدراحيمدى ومىرگە اكەلگەن كەزدە اناسى ۴۰ جاستا بولعان. اناسى انۋزا ايىمجانقىزى سماعۇل – سانالى عۇمىرىن ءۇي شارۋاسى مەن بالالارىنىڭ تاربيەسىنە ارناعان جان.

ال اكەسى نۇرجان، ياعني ازان شاقىرىپ قويعان اتى نۇرمۇحامەد حاميدوللاۇلى وقىتۋشى بولعان. ۱۹۳۷ جىلى قاراعاندى تاماق ونەركاسىبى تەحنيكۋمىن، ۱۹۴۰ الماتى پەداگوگيكالىق ينستيتۋتىنىڭ ءتىل جانە ادەبيەت فاكۋلتەتىن بىتىرگەن. مۇعالىم، مەكتەپ ديرەكتورى بولىپ قىزمەت ەتكەن. ۇلى وتان سوعىسىنىڭ ارداگەرى. ۱۹۴۱ جىلدان ۱۹۴۳ جىلعا دەيىن ستالينگراد تۇبىندەگى مايدانعا قاتىسقان. ۱۹۴۳ جىلدىڭ قاراشاسىندا جاۋ سناريادتارىنان كوپتەگەن جاراقات العان كىشى لەيتەنانت نۇرجان حاميدوللاۇلى وتباسىنا ورالىپ، كەيىننەن ۴۹ جاسىندا دۇنيە سالعان. انۋزا ايىمجانقىزى بالالارىن قاناتتىعا قاقتىرماي، تۇمسىقتىعا شوقىتتىرماي، ءبىر ءوزى تاربيەلەپ جەتكىزگەن.

۱۹۶۷ جىلى تسەلينگوگرادتاعى ؀۶۴ مەكتەپتىڭ تابالدىرىعىن اتتاعان گابدراحيم كامەنوۆ ۸-۱۰ سىنىپتى ؀۲۶ قازاق-ورىس ءتىلدى ارالاس مەكتەپتەن بىتىرگەن. مەكتەپ قابىرعاسىندا جۇرگەندە بارلىق بالالار سياقتى تەنتەك بولعانىن بۇگىندە استە جاسىرمايدى. وقۋشى كەزىندە سپورتپەن اينالىسىپ، گيتارا تارتۋعا دا اۋەس بولعان.

۱۹۷۸ جىلى رەسەيدىڭ پلەسەتسك پوليگون ايماعىندا اسكەري پارىزىن ورىنداعان. قارۋلاس دوسى توقسانباي نۇرحانوۆپەن ءالى كۇنگە دەيىن جاقىن ارالاسادى.

اسكەردەن ورالعان سوڭ وقۋعا تاپسىرىپ، تسەلينوگراد اۋىل شارۋاشىلىق ينستيتۋتىنىڭ ارحيتەكتۋرا فاكۋلتەتىن بىتىرگەن.

سول كەزدەن باستاپ بۇگىنگە دەيىن ارحيتەكتور بولىپ، دامىلسىز ەڭبەك ەتىپ كەلەدى.

“كازكوممۋنستروي” وندىرىستىك-كوممۋنالدىق بىرلەستىگىندە قاتارداعى ارحيتەكتور بولىپ ەڭبەك جولىن باستاعان گابدراحيم كامەنوۆ كەيىننەن “تسەلينوگرادجيلستروي” جوبالاۋ قۇرىلىس بىرلەستىگىندە توپ باسشىسى بولادى. ودان كەيىن ءار جىلدارى “نايزا قۇرىلىس” كونتسەرنىنىڭ “شابىت” جاۋاپكەرشىلىگى شەكتەۋلى سەرىكتەستىگىنىڭ جەتەكشى ارحيتەكتورى، قازاقستان رەسپۋبليكاسى قورعانىس مينيسترلىگى “اك” جاۋاپكەرشىلىگى شەكتەۋلى سەرىكتەستىگىنىڭ توپ باسشىسى، “استانا ترەيد ينتەرنەشنل” جشس-نىڭ “استانا مەگا پروەكت” جشس ديرەكتورى جانە جوبانىڭ باس ارحيتەكتورى قىزمەتتەرىن اتقارعان.

۱۹۸۳ جىلى گابدراحيم نۇرجانۇلى رىسجان باەشقىزىمەن وتاۋ قۇرعان. “بابالار بايتەرەگىن بالالار سايالايدى” دەگەندەي، ۇلدارى اسقار مەن رۋسلان ەر جەتىپ، انارا، الميرا ەسىمدى اۋلەتكە كەلىن تۇسىرگەن وتباسى بۇگىندە تامىرىن تەرەڭگە جايعان ماۋەلى بايتەرەكتەي. گابدراحيم نۇرجانۇلى رىسجان باەشقىزى – بۇگىندە ينارا، ءجانيا، ەسكەندىر، كامال، سۇلتان، توميريس اتتى نەمەرە ءسۇيىپ وتىرعان ارداقتى اتا، اسىل اجە.

Тарату:

قازىرگى قازاق ساتيراسى دەمالىپ جاتىر – كوپەن امىربەك (اۋديو)

Фото Нұрдәулет Кәкіштің мұрағатынан
Тарату:

استانا. KazUnite – قازاق ساتيراسىنىڭ ساردارى، قازاقستان جازۋشىلار وداعى باسقارماسى ساتيرا كەڭەسىنىڭ توراعاسى، “ارا” جۋرنالىنىڭ باس رەداكتورى بولعان كوپەن امىربەكتىڭ (۱۹۵۰-۲۰۲۲) كوزى تىرىسىندە ارىپتەسىمىزگە بەرگەن سۇحباتىنىڭ ىقشامدالعان نۇسقاسىن وقىرمان نازارىنا ۇسىنامىز.

“الەمدى ءازىل-سىقاق ساقتايدى”

– كوپەن اعا، ساتيرا جانرى تاريح قويناۋىندا قالىپ قويمادى ما؟ وزىڭىزدەن كەيىنگى ساتيريكتەر تۋرالى ايتىڭىزشى. بۇل جانر راسىمەن دە توقتاپ قالدى ما؟

– ءبىز دە قيلى-قيلى زاماندى، قىزىقتى ءداۋىردى باستان كەشىردىك قوي. ءبىزدىڭ جانىمىز دا، جانرىمىز دا ساتيرا بولعاننان كەيىن بۇكىل دۇنيەگە شىن كوزبەن، سىن كوزبەن قارايمىز. سوندا ءبىر مامىراجاي زامان بولدى دەپ ايتامىز. ول مامىراجاي زامان كەشەگى قىلىشىنان قان تامعان قىزىل يمپەريانىڭ قۇلدىراۋىمەن بىرگە كەتتى. سول كەزدە ءبىز توقىراۋ زامانىنا ۇشىرادىق دەدىك. سوندا فاريزا وڭعارسىنوۆا “مەن ءۇشىن بۇل توقىراۋ زامان ەمەس، جۇرتتىڭ ءبارى كىنالاپ، كۇسانالاپ جۇرگەن توقىراۋ زاماندا مەن تولىق شىعارماشىلىق كۇي كەشتىم”، – دەگەن بولاتىن. قازاقتا ساتيراعا بايلانىستى ەكى ۇعىم بار “توقىراۋ” جانە “توقتاۋ” دەگەن. توقىراۋ دەگەن – توقتاۋدىڭ الدىنداعى ۇعىم. ادام توقتايتىن كەزدە توقىرايدى عوي. ياعني توقىراعاننان كەيىن بارىپ توقتايسىڭ. بىراق ساتيرانى توقتادى دەپ ايتۋعا دا بولمايدى. توقىرادى دەگەنگە كەلەدى. نەگە؟ سەبەبى ءبىز ارعى بەيىمبەت مايلين، سەيدىلدا تولەشوۆتەردى ايتپاي-اق قويايىق، ودان كەيىنگى داۋىرلەگەن زاماندا اسقار توقماعامبەتوۆ، ءوسپانالى يماناليەۆ، شونا سماحانۇلى، وسپانحان اۋباكىروۆ، ەسەنجول دومباەۆ، سەيىت كەنجەاحمەتۇلى، قاجىتاي ءىلياسۇلى، قاپپاس قابىشۇلى، ۇمبەتباي ۋايديندەر قانداي شىعارمالار بەردى. جۇرت ىزدەپ ءجۇرىپ وقيتىن. شىعارمانىڭ تاقىرىبىنا ەمەس، اۆتورىنا قىزىعۋشىلىق باسىم بولاتىن. مىسالى، وسپانحان اۋباكىروۆ كىم دەگەندە ونىڭ شىعارماسىن وقىماي جاتىپ، جۇرتتىڭ ەزۋىنە كۇلكى ۇيىرىلەتىن. ال قازىر نە شىعارما، نە شىعارمانىڭ استىنداعى فاميليا دا جوق. قازىر بۇقارالىق اقپارات قۇرالدارى ەكىگە ءبولىنىپ كەتتى. ونىڭ ءبىرى – ءباسپاسوز، ەكىنشىسى – تەلەديدار. ساتيرانىڭ باسىم كوپشىلىگى سول ءازىل-سىقاق تەاترلارىنىڭ قويىلىمدارىنا، سكەتچتەرىنە، ينتەرمەديالارىنا اۋىپ كەتتى. ونى جۇرت كورەدى، ءماز بولادى، بىراق وي تۇيە المايدى، ساراپتاي المايدى. ءبىر ساتتىك قانا كۇلكى، ونىڭ ءوزى دە جەڭىل-جەلپى دۇنيە. “كودي-ءسودي”، “بىقي-تىقي” دەگەن سوزدەر بار قازاقتا. سول وتباسى، وشاق قاسىنان اسا الماي كەتتىك قوي. ءبىز تاۋەلسىزدىك العان ۳۰ جىلدىڭ ىشىندەگى جەتىستىكتەردىڭ ءوزى ءبىر بولەك، ال سونىڭ جولىندا قوعامعا كەسىرىن تيگىزىپ جاتقان كەسە-كولدەنەڭ كورىنىستەردىڭ بارلىعى تۇنىپ تۇرعان تاقىرىپ قوي. پرەزيدەنتىمىز ۇيىمداسقان قىلمىس پەن سىبايلاس جەمقورلىققا قارسى كۇرەستى “كۇشەيتەيىك”، – دەپ ۇنەمى ايتادى. بۇل قىلمىس دەگەنىڭ بورسىق سەكىلدى، بورسىق دەگەنىڭ ۇرعان سايىن سەمىرەدى. ءبىز كۇشەيگەن سايىن ول دا كۇشەيىپ بارادى، ءتىپتى كۇننەن-كۇنگە كۇشىكتەپ بارا جاتىر. مىنەكي، وسى تۇستا باسپاسوزدەگى ساتيرانى قولعا الۋ كەرەك دەپ ايتار ەدىم. ونىڭ ورتالىعى كەشە عانا ازۋىن ايعا بىلەگەن ساياسي-ساتيرالىق اتاقتى “ارا” جۋرنالىن قايتادان قالپىنا كەلتىرۋ كەرەك. “ەشكىمنەن قورىقپايتىن ادام كۇلكىدەن عانا قورقادى” دەگەن ءسوز بار. قانداي ارسىز، ۇياتسىز، يمانسىز بولسا دا، ونىڭ ارعى جاعىندا كىشكەنە قىتىق تۇرادى. ول ۇلتىن، وتباسىن، قوعامدى ەمەس، ءوزىنىڭ قاراحان باسىنىڭ عانا قامىن ويلاپ، سوعان جەتكىزىپ جاتىر. ءبىر قوماعايدىڭ بەتى بەرى قاراسا، ونىڭ ءوزى قوعامعا ۇلكەن پايدا عوي. قازاقستاننىڭ قارىشتاپ دامۋى ءۇشىن ساتيراداي قاحارلى قارۋدى قولدان تۇسىرۋگە بولمايدى. جىل سايىن بولگاريانىڭ گابروۆو دەگەن قالاسىندا دۇنيەجۇزىلىك ساتيريريكتەردىڭ بايقاۋى بولادى. سونداعى عيماراتتىڭ ماڭدايشاسىنا “الەمدى ءازىل-سىقاق ساقتايدى” دەپ جازىپ قويىپتى. نەگە؟ ويتكەنى ول قوعامدى قوقىستان تازارتادى. ادامنىڭ جان دۇنيەسىن جاڭارتادى. ەگەر ءارى قاراعان بەتىڭ بەرى قاراي بۇرىلسا، جولعا تۇسكەن جورعاداي بولاسىڭ. مىنە، ساتيرانىڭ قۇدىرەتى وسىندا.

“جايدارمان” دانەك سياقتى”

– قازىرگى ءازىل-سىقاق تەاترلارىنا كوزقاراسىڭىز قالاي؟

– رەسمي دەرەك بويىنشا قازاقستاندا ۱۸ ءازىل-سىقاق تەاترى بار ەكەن. باسى – “تاماشا”. “تاماشا” – قازىرگى ءازىل-سىقاق تەاترلارىنىڭ بارلىعىنىڭ اتاسى. ءبارى سوعان قاراپ ەلىكتەپ، سوعان قاراپ بوي تۇزەدى. ارينە، قازىرگى ءازىل-سىقاق تەاترلارىندا دا سۇبەلى-سۇبەلى دۇنيەلەر بار. بىراق ءبىر ماي، ءبىر ەت دەگەن سياقتى ءبىر ءان، ءبىر ازىلمەن فورمالىق جاعىنان ءبىرىن-ءبىرى قايتالاۋ بار. ەرەكشە بولىپ اۋەلى “شانشار” شىقتى. ول تاۋسىلدى. ونىڭ الدىندا “باۋىرجان-شوۋ” شىعىپ، ول دا توقىرادى. ال تۇرسىنبەك قاباتوۆتىڭ ءازىل-سىقاقتارىن قاعازعا تۇسىرسەڭ، ول وقىلمايدى. ءبىر توي باسقارىپ جۇرگەن اسابا سياقتى سويلەيدى. ارينە، كورەرمەن قابىلدايدى، كۇلەدى. بىراق سىقاقشى دەگەن جەتەكتە بولماۋى كەرەك. كەرىسىنشە، كورەرمەندى جەتەكتەۋى كەرەك. قازىرگى سىقاقشىلاردىڭ كوبى جەتەكتە ءجۇر. كۇندەلىكتى كۇيبىڭ تىرلىكتەگى بولىمسىز دۇنيەلەردى، قازاقى بولمىستى كۇلكى ەتەدى. ءبىز ونىمەن قايدا بارامىز؟! قازاقستاندا بۇگىندە ۵۴ دراما تەاترى بار. بىراق قازىر كومەديا بار ما؟ جوق. ساتيرالىق رومان بار ما؟ جوق. كەزىندە ەسەنجول دومباەۆتار ساتيرالىق رومان جازعان. ول سولارمەن كەتتى. ساتيرالىق روماندى بىلاي قويعاندا، ساتيرالىق پوۆەستەر دە جوق قوي ءتىپتى. مەن “ون سىقاقشى جابىلىپ ءجۇرىپ، وسپانحان اۋباكىروۆتىڭ ورنىن تولتىرا المايدى” دەپ پىكىر ايتقانمىن. ءبىر وسپانحاننىڭ ءوزى نەگە تۇرادى؟ “سوعىس جانە بەيبىتشىلىك” رومانىن جازىپ بىتكەندە لەۆ تولستوي: “ەندى ورىس ادەبيەتى مەنەن كەيىن ءبىراز جىلعا دەمالادى” دەپ ايتقان ەكەن. سول سياقتى قازىرگى قازاق ساتيراسى وسپانحان اۋباكىروۆتەن كەيىن، سەيىت كەنجەاحمەتوۆتەن كەيىن، كەشەگى دۇنيەدەن وزعان ۇمبەتباي ۋايديندەردەن كەيىن مەنىڭشە، دەمالىپ جاتىر. جاڭا تۇسكەن جاس كەلىننەن ءسابي كۇتەمىز عوي، “امان-ەسەن بوسانىپ السىن”، – دەپ. سول سياقتى ەندىگى جاس سىقاقشىلاردىڭ اناسىنىڭ اياعى اۋىر، ولار ءالى بوسانعان جوق. ال كوڭىلدى تاپقىرلار كلۋبى، سونىڭ ىشىندە “جايدارماندى” ايتاتىن بولساق، وندا جەمقورلار تۋرالى، باسقا دا ساياسي استارلى ازىلدەر كوپ ەمەس، بىراق بار. “جايدارمان” – ءدان. ونى ەگىپ جىبەرسە، جاقسى ءونىم الۋعا بولادى. سونداعى “ساعىز” كومانداسىنىڭ ازىلدەرىنە سۇيسىنەسىڭ. بىراق ولار “جايدارماننىڭ” جەڭىمپازى بولعان سوڭ كورىنبەي كەتتى. كەزىندە ۱۹۷۲ جىلى ەشكىم تانىمايتىن فيشەر دەگەن شاحماتشى الەمنىڭ نەبىر مىقتىلارىن تاس تالقان ەتىپ جەڭىپ، گروسسمەيستەر اتاندى. بىراق الەم چەمپيونى بولعان سوڭ جوق بولىپ كەتتى. “ساعىز” سياقتى كەيبىر جاقسى كوماندالار ءازىلدىڭ چەمپيونى بولعان سوڭ سول جەردەن توقتاپ قالادى. مىسالى، “بايدىڭ بالالارى” دەگەن كوماندا قانداي جاقسى ەدى. قازاقى ءداستۇردى دارىپتەدى. ولار دا فيشەردىڭ كۇيىن كەشىپ كەتتى. جالپى، مەن جاستاردى قولدايمىن.

مەنىڭ شاكىرتتەرىمنىڭ كوبىسى “زاپوروجەتس” دەڭگەيىندە قالىپ قويدى

– ءسىزدىڭ جولىڭىزدى جالعاپ جۇرگەن شاكىرتتەرىڭىز بار ما؟ جاستار اراسىنان كىمدى مىقتى سىقاقشى دەپ باعالار ەدىڭىز؟

– شاكىرت دەگەن نە؟ كۇرەس نەمەسە باسقا دا سپورت تۇرلەرى سياقتى بولماسا، ءازىل-سىقاقشىلاردان، انشىلەردەن شاكىرت تاربيەلەي المايسىڭ. نەگە دەسەڭ، و باستا تۋمىسىنان سولاي تۋماعاننان كەيىن اكەنىڭ قانىمەن، انانىڭ سۇتىمەن دارۋى ءبىر بولەك، “ۋىزىنان جارىماسا، وعان ەشتەڭە دارىمايدى” دەگەن ءسوز بار. مەن تاربيەلەگەن سىقاقشىلاردىڭ كوبىسى زەينەت جاسىنا جەتتى. ولار و باستاعى دەڭگەيىندە قالىپ قويدى. سەن زاپوروجەتستى قانشا جەردەن مايلاپ، ماتورىن تازالاپ، جارىسقا قوسقانمەن، ونىڭ ماتورى ارتىندا. ول بۇگىنگى مەرسەدەسىڭمەن نەمەسە باسقا دا كولىكپەن جارىسا المايدى. مەنىڭ شاكىرتتەرىمنىڭ كوبىسى سول “زاپوروجەتس” دەڭگەيىندە قالىپ قويدى. ويتكەنى ولاردىڭ جاراتىلىسىنان ماتورلارى سونداي ەدى. مىقتى سىقاقشىلاردى ەشكىم تاربيەلەگەن جوق. ولار وزدەرىنىڭ بويىندا بار قاسيەت پەن ىزدەنۋ ارقىلى وزدەرىن وزدەرى سۇيرەدى. قازاقتا “جەتەكتەپ قوسقان يت تۇلكى المايدى” دەگەن ءسوز بار. تۇلكى الا المايتىن ءيتتى قاشانعى ايتاقتايسىڭ؟ سول سياقتى قانشاما شاكىرتتەرىمىزدى دارىپتەپ، ءارى قاراي الىپ كەتسىن دەپ تۇيمەدەي دۇنيەنى تۇيەدەي ەتىپ كورسەتتىك. بىراق ءبارىبىر سول جەتەكتەگى تازى سياقتى ءوز بەتىمەن اڭ اۋلامايدى. ول ءۇشىن ونى كىنالاۋعا دا بولمايدى. ويتكەنى ونىڭ بولمىسى سولاي. قازىرگى ۋاقىتتا سىقاقشىلاردىڭ ىشىندە مىقتى دەپ مۇحتار شەرىمدى عانا ايتار ەدىم. ونىڭ ءوزى دە بۇگىندە زەينەتكەرلىككە شىقتى.

پارودياعا ىلىگەر تۇلعالار تاۋسىلدى ما؟

– سۇحباتتارىڭىزدىڭ بىرىندە “پارودياعا ىلىگەر تۇلعالار تاۋسىلدى” دەپسىز. ودان بەرى ون شاقتى جىل ءوتىپتى. ءالى دە وسىنداي ويداسىز با؟

– جوق، قازىر بار. مىسالى، يمانعالي تاسماعامبەتوۆكە نەگە پاروديا جاساماسقا؟! وعان پاروديا جاساي وتىرىپ، ونىڭ كوزقاراسى مەن پاراسات-پايىمىن بەرۋگە بولادى. سول سياقتى سەكسەنگە كەلگەن امانگەلدى ايتالى قاريامىزعا نەگە پاروديا جاساماسقا؟! قانداي قايرەتكەر؟! قازاقتىڭ ادەت-عۇرپىن، ءداستۇرىن، سالتىن ساقتاي وتىرىپ، الەمدىك دەڭگەيدە ويلايتىن قازاقستاننىڭ بولاشاعى ءۇشىن قابىرعاسىن قاۋساتىپ جۇرگەن قاريامىز عوي. سونىمەن قاتار ەرجان ماكسيم، دانەليا تولەشوۆا، ديماش قۇدايبەرگەن سياقتى ءبىزدىڭ جاس انشىلەرىمىز شىعىپ جاتىر. وليمپيادا چەمپيونى يليا ءيليننىڭ رەكوردىن جاڭارتقان قاراعاندىدان ءبىر سپورتشى شىقتى. وسىلارعا پاروديا جاساۋعا بولادى. مۇنداعى ماقسات ولاردى دارىپتەۋ ەمەس، سول ارقىلى كەم-كەتىكتى جەتكىزىپ وتىرسا عاجاپ دۇنيە بولار ەدى. سونداي-اق پارلامەنتتە بىرنەشە رەت سايلانىپ، بىراق ۇندەمەي وتىرعان دەپۋتاتتارعا دا نەگە پاروديا جاساماسقا؟! ولاردىڭ ءۇنىن دە شىعارۋ كەرەك قوي. نەمەسە ىركەس-تىركەس ءبىرىنىڭ شاڭىنا ءبىرى كومىلىپ جاتقان ءازىل-سىقاق تەاترلارىنا دا پاروديا جاساۋعا بولادى.

– سۇحباتىڭىزعا راقمەت!

سۇحباتتاسقان نۇرداۋلەت كاكىش

 

Посмотреть эту публикацию в Instagram

 

Публикация от KazUnite (@kazunitecom)

Тарату: